95-тӥ сезон премьераен ворсаськиз!
Удмурт театрын ортчиз сезонлэн берпуметӥ премьераез - «На дне» спектакль. Постановкаын режиссёр Андрей Цисарук условной, образной кылэз уже кутыса но пьесалэсь притчевой сямзэ пусйыса бытовизмлэсь палэнскыны тырше. Спектакль контраст вылын лэсьтэмын. Чурытлык но ненеглык, йыркуръяськон но лякытлык. Режиссёр персонажъёсты али дыре, льӧль малпанъёслэсь, ортчемзэ тодэ ваёнъёслэсь но пӧйшур инстинктъёслэн дунне вискыосы выйытэ. Геройёс — кӧлон интыын улӥсьёс, асьсэды ыштэмъёс но чылкак «пыдэсаз» лэзькемъёс - асьсэлэн чигиськеменызы жалян гинэ кылдыто. Постановщик геройёслэн пуш дуннезылы саклык висъя. Отын чурыт, кудӟыса вожпотон сяна, улэ «зарни кар» но «шонер музъем» вылэ дӥсьтӥсьтэм осконлэн гыбдась тылыз. Но удалтоз-а соослы улонзэс воштыны, уз пӧрмы-а малпанъёссы мӧзмонлы гинэ? Пулъёслэсь, кортлэсь, небыт шудонъёслэсь декорациос но туала улонлы тупась но геройёслэсь пӧйшур сямзэс возьматӥсь костюмъёс, кылдытэмын суредасьлэн Дмитрий Разумовлэн эскизъёсызъя, сюлэмшугъяськытӥсь мылкыдъёсы пыӵам крезьгурез крезьгурчилэн Александра Микаелянлэн - ваньмыз атмосфера кылдытон понна ужа но учкисез югдурез жаляны мылкыд сётэ. Спектакль зэмлыко но мур пӧрмиз! Артистъёс огшоры гинэ ӧз шудэ, асьсэ персонажъёссылэн историосазы улӥзы, туж зэмлыко! Премьераен сюлмысьтымы ӟечкыласьком спектаклез пуктӥсь командаез, таланто артистъёсты, театрысь цехъёсын но подразделениосын вань ужасьёсты, кудъёсыз поттӥзы та мур, сюлме пырись но атмосферной спектаклез! Сӥзиськомы ваньзылы творческой мылкыд, быронтэм кужым но выль кичӧлтонъёс, нош спектакльлы кема сценической улон! 95-тӥ сезонмы ворсаськиз! Адӟиськомы вуоно сезонын капчи мылкыдын, бадӟым планъёсын но ӟечезлы осконъёсын! Выльысь пумиськытозямы!
