Иворъёс

17.07.2026 г.

95-тӥ сезон премьераен ворсаськиз!

Удмурт театрын ортчиз сезонлэн берпуметӥ премьераез - «На дне» спектакль. Постановкаын режиссёр Андрей Цисарук условной, образной кылэз уже кутыса но пьесалэсь притчевой сямзэ пусйыса бытовизмлэсь палэнскыны тырше. Спектакль контраст вылын лэсьтэмын. Чурытлык но ненеглык, йыркуръяськон но лякытлык. Режиссёр персонажъёсты али дыре, льӧль малпанъёслэсь, ортчемзэ тодэ ваёнъёслэсь но пӧйшур инстинктъёслэн дунне вискыосы выйытэ. Геройёс — кӧлон интыын улӥсьёс, асьсэды ыштэмъёс но чылкак «пыдэсаз» лэзькемъёс - асьсэлэн чигиськеменызы жалян гинэ кылдыто. Постановщик геройёслэн пуш дуннезылы саклык висъя. Отын чурыт, кудӟыса вожпотон сяна, улэ «зарни кар» но «шонер музъем» вылэ дӥсьтӥсьтэм осконлэн гыбдась тылыз. Но удалтоз-а соослы улонзэс воштыны, уз пӧрмы-а малпанъёссы мӧзмонлы гинэ? Пулъёслэсь, кортлэсь, небыт шудонъёслэсь декорациос но туала улонлы тупась но геройёслэсь пӧйшур сямзэс возьматӥсь костюмъёс, кылдытэмын суредасьлэн Дмитрий Разумовлэн эскизъёсызъя, сюлэмшугъяськытӥсь мылкыдъёсы пыӵам крезьгурез крезьгурчилэн Александра Микаелянлэн - ваньмыз атмосфера кылдытон понна ужа но учкисез югдурез жаляны мылкыд сётэ. Спектакль зэмлыко но мур пӧрмиз! Артистъёс огшоры гинэ ӧз шудэ, асьсэ персонажъёссылэн историосазы улӥзы, туж зэмлыко! Премьераен сюлмысьтымы ӟечкыласьком спектаклез пуктӥсь командаез, таланто артистъёсты, театрысь цехъёсын но подразделениосын вань ужасьёсты, кудъёсыз поттӥзы та мур, сюлме пырись но атмосферной спектаклез! Сӥзиськомы ваньзылы творческой мылкыд, быронтэм кужым но выль кичӧлтонъёс, нош спектакльлы кема сценической улон! 95-тӥ сезонмы ворсаськиз! Адӟиськомы вуоно сезонын капчи мылкыдын, бадӟым планъёсын но ӟечезлы осконъёсын! Выльысь пумиськытозямы!

30.06.2026 г.

«Алые паруса» яр дурын лопыръяськиз

29-тӥ инвожое ӝытазе Удмурт Элькунысь кун йӧскалык театр Иж прудлэн яр дураз «На родине П.И. Чайковского» искусствоосъя фестиваль улсын «Алые паруса» мюзикл возьматӥз. Туэ Удмурт театр нырысьсэ пыриськиз бадӟым ужрадэ. Спектакльын рольёсты шудӥзы Наталия Буранова (Ассоль), Константин Никитин (Грэй), Сергей Наговицын (Меннерс-младший), Удмуртиысь калык артист Вячеслав Красноперов (Эгль), Удмуртиысь калык артист Игорь Моисеев (Лонгрен), Удмуртиысь дано артистка Елена Сунцова (Меннерслэн кышноез, Анай), Удмуртиысь калык артистка Валентина Моисеева (Маяклэн кузёез), Удмуртиысь калык артист Геннадий Бекманов (Священник), Роман Болтачев (Меннерс-старший), Удмуртиысь калык артист Александр Баймурзин (Скрипач) но театрысь артистъёс. Таиз возьматон актёръёслы но театрын ужасьёслы аспӧртэмлыко луиз. Со мылкыдэз ӝутонэн герӟаськем огшоры тулкымъяськон гинэ ӧз луы, туж бадӟым кылкутонлы пӧрмиз. Выль площадка, выль технической куронъёс, выль быгатонлыкъёс. Режиссёр-постановщик Алексей Ложкин постановкаез выль куронъёслы чӧлскыса тупатӥз: историез юнгес, яркытгес но мылокыдогес карон понна, сцена вылын декораци сяна, мультимедийной сценография кылдытэмын вал: действие бадӟым видеопроекциос дыръя радъяськиз, нялтас вераса, сое дасяны юрттӥз ИИ. Нош сцена вылын спектакль мыныку, ву вылтӥ льӧль парусъёсын тӧдьы яхта гылӟиз. Синмаськытӥз но оскытӥз кадь со, Ассольлэн малпанэз зэмзэ но быдэсмоз но со «принцен ӵош шунды ӝужан палась чилясь шаере кошкоз, отын сое кизилиос инмысь васькыса лыктэменыз ӟечкылалозы». Куазь шоры учкытэк, спектакль 3 сюрслэсь ятыр учкисьёсты люказ. Котькуд кыл, кырӟан, эктон нош ик усьтӥськон кадь чузъяськиз но сюлэмъёсы кылиз. Кырын ортчем возьматон - Удмурт театрысь коллектив понна нош ик быгатонлыксэ эскериз но учкисьёслы яркыт мылкыдъёс кузьмаз но огинэ огазеяз. Ми сюлмысь тау шуиськомы вань учкисьёслы та ӝытэз шумпотонэн но шунытэн тырмытэмзы понна. Туспуктэмъёс Удмурт Элькунысь кун йӧскалык театр но Евгений Князев

26.06.2026 г.

«Алые паруса» кырын возьматэмын луоз!

Удмурт театр «Алые паруса» мюзиклэз (16+) кырын возьматоз нырысьсэ. Та экспериментэз но выль опытэз улонэ пыӵатьыны луонлык кылдӥз «На родине П.И. Чайковского» искусствоосъя фестивалез радъям улсын. Та ужрадэ театр нырысьсэ пыриське. Выль инты постановкае витьымтэ шорысь аспӧртэм воштӥськонъёс пыртоз, нош сое азьвыл адӟылэм учкисьёслы выль мылкыд кузьмалоз. Сюжетлэн шорсюлмыз - Ассоль но Грей, соослэн улон сюрессы пӧртэм югдуръёслы пумит герӟаськемзы. Пичи дырысен тодмо мадёс возьматэмын выль сямен ке но, валтӥсь малпанэз вошъяськисьтэм – яратонлы оскон но паймымон учырез витён. Кылыз: ӟуч Спектакль возьматэмын луоз 29 инвожое 21 часын набережной сцена вылын Пыронэз эркын. «На родине п.И. Чайковского» искусствоосъя 69-тӥез фестиваль Удмуртиын 25-тӥ инвожоысен 5-тӥ пӧсьтолэзёсь ортчоз. 2026-тӥ арын Россиысь одӥгез тужгес вашкалаез крезьгуро фестиваль нырысьсэ выль форматэн ортчоз, крезьгурез, театрез, туала искусствоез но гастрономиез огазеялоз.

23.06.2026 г.

«Удача сезонаын» нош ик удалтон

21-тӥ инвожое Удмуртиысь театр удысын ужасьёслэн огазеяськонзылэн «Удача сезона» IX-тӥ конкурсаз вормисьёсты пусйизы. «Лучшая женская роль» номинациын нош ик вормисе потӥз Наталия Буранова. 2024-тӥ арын актрисаез «Ышем лулъес» («Пропащие») спектакльын Неизвестная ролез понна пусйизы. Таяз радэ одӥг нимъем мюзиклысь Айналэн ролез понна номинировать каризы. «Лучшая женская роль второго плана» призэз Удмурт Элькунысь дано артистка Елена Сунцова басьтӥз. Удмурт Элькунысь калык артист Вячеслав Красноперов «МОНО-ЛИР» актёрской чеберлыко кылъя конкурслэн Гран-приеныз пусъемын. Со сяна, Удмурт театрлэн коллективез «За большой вклад в развитие театрального искусства, сохранение лучших традиций российского репертуарного театра на благо процветания культуры нашего Отечества, развитие и укрепление творческих связей и в связи с 95-летним юбилеем со дня основания театра» Росси Федерациысь театр удысын ужасьёслэн огазеяськонзылэн Данъян грамотаеныз пусъемын. Ӟечкыласькомы вормонэн! Сӥзиськомы яркыт творческой малпанъёс, ужрадъёс но быронтэм капчи мылкыд!

11.06.2026 г.

Россилэн нуналэныз!

Гажано эшъёс! Вань сюлмысьтымы ӟечкыласькомы тӥледыз матэктӥсь праздникен - Россилэн нуналэныз! Сӥзиськомы тӥледлы та дуннеысь вань шунытсэ-чылкытсэ, шумпотон, ӟеч улон, ог-огдэс валан, ӟеч пумиськонъёс но шудо вакытъёс!

09.06.2026 г.

«На дне» премьералэн суредсез вуиз

Театрлэн цехъёсаз вуизы пӧсь вакытъёс: примеркаос, тупатъянъёс но выль образъёсты ас вылазы мертанъёс! Москваысь режиссёр Андрей Цисарук но суредась Дмитрий Разумов «На дне» премьераын ужзэс азьланьтыны лыктӥзы. Вуриськон но бутафор цехъёсысь усточиос суредасен ӵош костюмлэсь котькуд люкетсэ кенешизы, эскеризы. Таӵе эскерон ужъёс туэ кулэ: чыры-пыры детальёс но пуштроссэ юнматыны быгато, геройёслэсь сямзэс усьто но соослэсь «пудо-живот» люкетсэс пусъё. Премьера 16-тӥ пӧсьтолэзе ортчоз. Билетъёс вузасько ни.

03.06.2026 г.

«Вить кизилиен» дунъет!

Милям ужмы дунъямын «ВИТЬ КИЗИЛИЕН»! Удмурт театр Quick Tickets билетной сӧзнэтлэсь «За высокие достижения в работе с зрителями» нимысьтыз кузьым басьтӥз. Вить кизилиё стикеръёсты но медалез ужъюрт сярысь ӟеч дунъетъёс но учкисьёс сярысь сюлмаськемзы понна сётӥзы. Арлы быдэ Quick Tickets команда Россиысь котькуд театрлы сезонэзлы йылпумъянъёс лэсьтэ. Со котьку туж шуныт кылъёс но тросэз сярысь верась лыдпусъёс. Син азяды гинэ пуктэ: Та кузьым — коллективмылэн нуналлы быдэ тыршыса ужамезлэн но тӥляд юрттэмдылэн но оскемдылэн емышез, гажано учкисьёс. Тау тӥледлы милемын кусып воземды понна, вань ӟеч кылъёстылы, дэмланъёстылы но милемын ӵош вамыштэмды понна!

20.05.2026 г.

Услугаос сётон условиосты дунъян (НОК)

Гажано учкисьёсмы! Услугаос сётон условиосты дунъян понна QR-кодэз сканировать каре яке выже меӵак чӧлскон пусъя Тодады вайытӥськом, та дунъян луонлык сётэ услугаос сётон условиослэсь ӟечлыксэс дунъяны но отзыв яке вазиськон кельтыны но солы валэктон басьтыны, ортчытэм дунъетлэн йылпумъянъёсыз вылэ пыкиськыса тырмымтэосты палэнтонъя планэн тодматскыны, ужъюртлэн туала рейтингеныз тодматскыны, рейтинген соглаш яке соглаш луымтэез сярысь пусйыны Тӥляд дунъетты юрттоз милемлы ужмес умоятыны!

15.05.2026 г.

Ми «Одноклассникын» выль адресэ выжим!

Гажано эшъёс! Театрлэн «Одноклассники» бамаз гожтӥськемъёслы (но гожтӥськыны малпаськисьёслы) ивортӥськомы, технической мугъёсъя мукет адресэ выжиськомы шуыса: Шуг-секытъёс кылдэм понна вождэс уд вае но валалоды шуыса туж оскиськомы. Гожъялэ, комментировать каре, малпанъёстэс кельтэ, юанъёс сётъялэ, огъя вераса, театрлэсь историзэ милемын ӵош кылдытэ! Возьмаськомы тӥледыз театрлэн группаяз! :)

08.05.2026 г.

Удмурт театр война аръёсы

Быдӟым Атыкай ож дыръя тросэз театръёс азьланьтӥзы ужзэс, калыклы ӟечезлы оскон, улыны но вормыны кужым сётӥзы. Война кутскон азьын, Удмурт театрлэн гастрольёсыз Глазовын ортчизы. Артистъёс сьӧразы вайизы кӧня ке спектакльёс. Труппа вань кужымзэ сётыса ужаз, возьматонъёсты но калык туж умой пумитаз. Огаз шутэтскон нуналэ 22-тӥ инвожое театрлэн коллективез инкуазе шутэтскыны потӥз, Чупчи шур доры. Нуназе пал секыт ивор вӧлмиз: война. Воргоронъёслы военкоматэ лыктыны предписание вуиз. Войнае кошкизы егит актёръёс, театрын ужасьёс, тросэзлы соос пӧлысь бертыны ӧз кылды ни. УАССР-лэн Совнаркомезлэн пуктэмезъя, театр ворсаськиз. Кӧнязэ ке артистъёсты ож тӥрлык поттон заводэ ужаны келязы. Кожалод, Удмурт тетарлэн улонэз кысӥз шуыса. Но 20-тӥ коньывуонэ 1942-тӥ аре нимысьтыз постановлениен Удмурт театрез нош ик усьтӥзы но ужаны Алнаш черкогуртэ выжтӥзы. Коллективез выльысь улӟытоно луиз: заводъёсын ар ӵоже ужатозязы артистъёс ӧнеръёслы дышизы, вылӥ разрядъёс басьтӥзы, туж ик кошкемзы ӧз поты ни. Озьы ке но артистъёсты но театрын ужасьёсты люканы пӧрмиз. Та бордын бадӟым ватсэтэз режиссёрлэн но актёрлэн Кузьма Алексеевич Ложкинлэн. Алнаше выжон секытэн ортчиз, толэзь пала кыстӥськиз. Транспорт ӧй вал, Можгаозь товарнякъёсын, отысен валъёсын мынӥзы. Ёрос клубе интыяськем театрлы ужэз капчиен ӧз сётскы. Артистъёслы эстӥськисьтэм юртъёсын, аналтэм коркаосын, куашкан калэ вуэм черкъёсын яке сарай выллем школаосын пӧсь куазен но, кезьытэн но шудоно луиз. Номыр шоры учкытэк, артистъёс потазы оскымон учкисьсы азе. Улэп выступлениос кузьмазы тужгес дунозэ - ӵуказе нуналлы оскон, соос адямиослэсь мылкыдзэ ӝутылӥзы, лулъёссэс шунтылӥзы, нош куд-огезлы куректонлэсь палэнскыны юрттылӥзы. 1943-тӥ арлэн пумаз театр Можгала выже. Табере спектакльёс Можга РДК-ын ортчылӥзы. Театрлэн репертуараз войналы сӥзем пьесаосъя спектакльёс пыризы: А.Арбузовлэн «Бессмертный», К.Симоновлэн «Русские люди», Ф.Кноррелэн «Встреча в темноте» ужъёссы но мукет. Со сяна, ӟуч классика но пуктылӥськиз, кылсярысь, А.Островскийлэн «Бедность не порок», «Без вины виноватые» пьесаосъя спектакльёс. Удмурт кылын пуктӥзы И.Гавриловлэсь «Аннок» драмазэ. Со сяна, труппа колхозъёсы концертэн потамысь ӧз дугдылы. Война куспын театрысь артистъёс куать сю концертъёс но спектакльёс сётӥзы. 1944-тӥ арын сӥзьыл театрез Иже вайизы. Солэн постановкаосыз нылпи клубын ортчылӥзы. Удмурт театрлэн спектакльёсыз ар но ӝыны ӵоже отын мынӥзы. 1- тӥ южтолэзе 1945-тӥ арын «Вуж Мултан» спектакльэн премьераез ортчиз. Та арын ик, 1945-тӥын, театр Россиысь йӧскалык театръёс куспын ортчись вожвылъяськонэ пыриськиз. Отын К.Симоновлэн «Русские люди», М.Петровлэн «Вуж Мултан» ужъёссыя спектакльёс возьматэмын вал. Удмурт театр тылэз, вуэз но ыргон гумыосты ортчиз, трос куректонъёс, шуг-секытъёс пыртӥ потӥз, но со ӧз сётскы, ӧз чалмытскы, нош ик сяськаяськиз война бере ньыльдонэтӥ аръёсы, адямиослы ӟечезлы оскон сётыны тыршыса. Тодэ ваёнъёсмы — со кышкасьтэм, ас удысэзлы оскись театрын ужасьёсты - актёръёсты, режиссёръёсты, суредасьёсты, крезьгурчиосты, сцена сьӧрын ужасьёсты - сӥлы карон, угось соос но асьсэлэсь визь-кужымзэс ватсазы огъя Вормонэ.

07.05.2026 г.

9 Май! Вормон Нунал!

ОСКЫ, РОДИНА! Оло куинь уй, оло ньыль уй Ӧм кӧлэ ни, вунэтӥ. Зурка музъем, пазяське сюй, Вамыштӥськом тыл пыртӥ. Сьӧд убир, каргам убир Саптаз Россей музъеммес. Кӧня городъёсмес сутӥз, Быдтиз узыр гуртъёсмес. Сюрсэн калык ошылэмын, Ыбылэмын соосын. Ведь со ваньмыз милям визьмын, Ваньмыз сюлме мертчемын. Вожпотонэн ӝуась тыр гадь Секытлэсь шат кышкалоз? Сьӧсь бырытозь, воин уз жадь, Тушмонэз со турналоз. Берыктомы ваньмыз понна Урмем Гитлер армилы, Оскы, калык, оскы, страна, Котьку оскы милемлы. (ФИЛИПП КЕДРОВ) 8.02 1944)

07.05.2026 г.

«На дне» премьералы дасяськон

Йӧскалык театрын Максим Горькийлэн «На дне» спектакль бордын дасяськон ужъёс кутскизы. Та премьераен юбилей сезон йылпумъяськоз. Спектаклез пуктыны ӧтемын Москваысь ӧнерчиос: режиссёр Андрей Цисарук но суредась Дмитрий Разумов. Режиссёр артистъёсын пумиськыса пьесаез ӵош лыдӟизы, пуштроссэз ласянь кенешизы, персонажъёслэсь сямъёссэс эскеризы, соослэсь биографизэс радъязы, выросъёссылэсь мотивацизэс валэктӥзы. Оштолэзь пумын декорацилэсь но костюмъёслэсь эскизъёссэ уже кутон сярысь пумиськон ортчиз. Спектакльлэн суредасез Дмитрий Разумов пулъёслэсь, кортлэсь, басмаослэсь, гозыослэсь, шубаослэсь но небыт шудонъёслэсь синмаськымон сценография кылдытӥз, озьы со кӧлон интылэсь зӥбись атмосферазэ возьматыны амал шӧдьтӥз. Чеберлыко оформленилэн дырлы думылэмын ӧвӧл ке но, туала улонлы тупась костюмъёс геройёслэсь сямъёссэс кужмоято но соослэсь «пудо-живот» люкетсэс пусъё. Постановкаез традиционной бытовой спектакль шуыны секыт, татын трос метафораос, ватэм малпанъёс, символъёс. Премьера чакламын 16-тӥ пӧсьтолэзе. Спектакль ӟуч клын мыноз. Билетъёс вузасько ни.

13.04.2026 г.

Дунтэк басьтомы

Гажано эщъёс! Тӥляд луонлыкты вань спектакльлэн соавторъёсыз луыны, со дыре ик – вуж арбериостылы кыкетӥ улон кузьманы. «На дне» выль спектаклез пуктон понна Удмурт театр дунтэк басьтоз вуж шубаосты, дубленкаосты но небыт шудонъёсты 30 см но солэсь вылӥынгес . Учкелэ шкафысьтыды, балконысьтыды, кладовкаысьтыды... Оло ӵапак отын соос витё кизили дырзэс? Сётыны луоз 30-тӥ оштолэзёсь. Иворъёсъя но юанъёсъя 8-950-816-60-86

30.03.2026 г.

80+60. Владимир Сафоновлэн юбилеез

27-тӥ южтолэзе, Театрлэн нуналаз, Йӧскалык театрын ортчиз режиссёрлэн Владимир Сафоновлэн юбилей ӝытэз. Россиысь дано артист, Удмуртиысь калык артист, Удмуртиысь искусство удысысь дано ужась 80 арес тырмонзэ но 60 ар творческой ужезлы тырмонзэ пусйиз. Учкисьёслы «Бесприданница» спектаклез возьматӥзы но Владимир Ивановичлэн улонэныз томатӥзы. Саратовской театральной училищеез йылпумъяса, со Ижкаре вуиз, актер луыса ужаз, собере тоджмо "Щукаын" режиссеёре дышетскиз., Удмуртиысь ньыль тетаръёслэн сцена вылазы спектакльёс пуктылӥз, элькунмылэн улоназ быдэс бадӟым инты басьтӥз. Сцена вылысен ӟечкыланъёсын, шуныт кылъёсын вазиськизы Удмурт Кун Кенешысь лулчеберетъя, туризмъя но йӧскалык политикая ялан ужась ӧрилэн Председателез А.И.Ураськин, Удмурт Элькунысь лулчебертъя министр В.М.Соловьев, Удмуртиысь СТД-лэн кивалтӥсез А.Г.Мустаев, Йӧскалык театрлэн кивалтӥсез С.А.Чирков, Ӟуч, Мунё но Удмурт театръёсысь ужюлтошъёсыз. Ӝытлэн пумаз Владимир Иванович люкаськемъёслы тау кылъёссэ вераз но паймытӥз ачиз гожтэм кылбуреныз. Юбилеен, гажано Мастермы! Сӥзиськомы Тӥледлы тазалык, азинлык, яркытэсь малпанъёсстэз быдэстыны юн кужым!

25.03.2026 г.

ӞЕЧКЫЛАСЬКОМЫ!

Йӧскалык театрысь валтӥсь режиссёр, Удмурт Элькунысь калык артист АЛЕКСЕЙ ЛОЖКИН Лулчебертъя министертстволэн Данъян пул вылаз пыртэмын. Ӟечкыласькомы Алексей Арсентьевичез вылӥ данъетэн! Сӥзиськомы азинсконъёс но выль вормонъёс!

18.03.2026 г.

Спектаклез выжтон

Жаляса верано, та шундыё нунал спектакль выжтон сярысь иворъёс бордысен кутске. Куд-ог артистъёслэн тазалыксы лябӟемен, «А зори здесь тихие...» спектакль, кудӥз чакламын вал 19-тӥ южтолэзьлы, возьматэмын луоз 31-тӥ южтолэзе. Кутсконэз 18 часын Гажано учкисьёс, малпанъёстэс тӥяммы понна извинить карыны куриськомы но туж оскиськомы валамдылы, нош артистъёсмылы ӝоггес бурмыны сӥзиськомы! Басьтэм билетъёс уз ыше, сосын учкыны луоз выжтэм спектаклез. Выжтон нунал тӥледлы уг тупа ке, билетэз берыктыны быгатоды отчы ик, кытысь басьтӥды. Юанъёс: (3412) 78-79-81, (3412) 78-45-92, +7-901-860-55-19 (касса)

13.03.2026 г.

Выль выжыкылэз дасян

Театр дася выль нылпи выжыкыл. Суредась Андрей Стародумов театрлэсь Худсоветсэ но творческой цехъёсты «Как Иван Василису выручал» выль выжыкыллы дасям декораци макетэн но костюм эскизъёсын тодматӥз. Пуктӥсь режиссёрез - Константин Ложкин. Премьералэн возьматонъёсыз чакламын толсуре.

13.03.2026 г.

Южтолэзь скидкаос

Шумпотӥськомы тулыслэн нырысетӥ толэзезлы но кузьмаськомы 50% скидка таӵе ӝыт спектакльёслы:  14-тӥ южтолэзе 17 часын – «Ышем лулъёс» пьеса-размышление жанръя пуктэм спектакль (16+);  21-тӥ южтолэзе 17 часын –«Матронлэн егит картэз, яке Атас Гири-2» комедия (16+);  26-тӥ южтолэзе 18 часын – «Лемлет Исьтапанлэн зарниез» комедия (12+). Скидкаен басьтыны быгато пенсионеръёс, студентъёс(возьматыны луэ электрон амалэн студенческой билетэз), школьникъёс, инвалидъёс, начар ваньбуро улӥсь но трос нылпиё семьяос. Ӝыны дунын билетъёсты басьтыны луэ театрлэн кассаяз гинэ. Касса: +7 (3412) 78-45-92, +7 901 860 55 19.

...

Купить билеты онлайн

Купить сертификат