Государственный Национальный театр Удмуртской Республики

- Выль вакансия: АДМИНИСТРАТОР Удмурт Элькунысь йӧскалык кун театр аслаз командаяз мыло-кыдо, кылкутӥсь но творческой адямиез утча! Мар кароно: театрысь социальной сетьёсты нуон; рекламаен но анонсъёсын ужан; учкисьёсын ужан (пумитан, консультациос но юанъёсъя юрттэт); спектакльёсын дежурство. Одно ик: - удмурт кылэз тодон. - Ми возьмаськом сое, кин: театрез яратэ но солэн улонэзлэн оглюкетэз луэмез потэ.; адямиосын кусып возьыны но командаын ужаны быгатэ.; дась дышетскыны но выль малпанъёс ӵектыны. Условиос: собеседованиын эскерисько. - Вань юанъёс телефон пыр: 51-17-75 - Резюме ыстэлэ : ok-udmteatr@yandex.ru Итӥське бадӟым театральной семьямы борды! Ми возьмаськом ӵапак тонэ! ❤

02.09.2026 г.

96-тӥ сезон!

🎭Театрмылэн борддоръёсаз кенешон ортчиз, со сӥземын выль 96-тӥ театр сезонлы. Мар милемыз возьма выль сезонын? ✨ Выль спектакльёс. 👶 Выжыкыл тужгес но пичиосызлы 🚌Калмыкие Бадӟым Гастрольёс - милемыз возьма Элиста! Дасяськиськом выль сценаосын шудыны но учкисьёслэсь сюлэмъёссэс вырӟытыны. Пӧсь луоз! Иворъёсмес эскере 🔥

02.09.2026 г.

"Араш" Большие Гастроли Национального драматического театра имени Басангова Республики Калмыкия

Сак кариське, театрез дунъясьёс! Ӝоген, 25-27 куарусёнэ, Удмурт Элькунысь йӧскалык кун театрлэн сцена вылаз «Бадӟым Гастрольёс»федерал программа улсын аспӧртэмлыко спектакльёс луозы. Ми доры Калмыкия Элькунысь Басангов нимо йӧскалык драмая театр репертуарысьтыз одӥгез тужгес лэчыт спектакльзэ возьматоз. 🎭 «Араш»Спектакль-реквием 25-тӥ куарусёнэ 18 часын тӥледыз вите одӥг действиын драматической фантазия-со спектакль-реквием, кудӥз одӥг семьялэн адӟонэз пыр возьматэ быдэс калыклэсь трагедизэ. Мар сярысь та спектакль? Сюжетлэн шорсюлмыз-Араш нимо пияшлэн сюлме пырись историез, кудӥз нуналлы быдэ фронтысь лыктӥсь эшелонъёсты пумита, атайзэ адӟыны оскыса. Со уг тоды вордскем степьзэ, но солэн паймымон ужлы оскемез солы азьланяз улыны кужым сётэ. Со 1943-тӥ арын 28-тӥ толсуре калмык калыкез Сибире депортировать карем кышкыт учыръёс дыръя оскон, яратон но осконтэм юн мылкыд сярысь история. Малы учконо? Со Россияысь но Калмыкия Элькунысь искусство удысысь дано ужасьлэн Борис Манджиевлэн постановкаяз спектакль, кудӥз кемалась но юн пыриз Калмык театрлэн зарни фондаз, Озьы ик Борис Манджиев сцена выламы пуктӥз "А зори здесь тихие..." 📌 Важной информация Кузьдалаез: 1 час 25 минут. Кыл: Спектакль ӟуч кылын мынэ. Арлыдъя сюбегатон: 12+. Историез борды йӧтскыны но спектаклез удмурт сцена вылысь адӟыны луонлыктэс эн ыштэ! 🗓 Дата: 25 куарусёнэ Кытын: Удмурт Элькунысь йӧскалык кун театр

17.07.2026 г.

95-тӥ сезон премьераен ворсаськиз!

Удмурт театрын ортчиз сезонлэн берпуметӥ премьераез - «На дне» спектакль. Постановкаын режиссёр Андрей Цисарук условной, образной кылэз уже кутыса но пьесалэсь притчевой сямзэ пусйыса бытовизмлэсь палэнскыны тырше. Спектакль контраст вылын лэсьтэмын. Чурытлык но ненеглык, йыркуръяськон но лякытлык. Режиссёр персонажъёсты али дыре, льӧль малпанъёслэсь, ортчемзэ тодэ ваёнъёслэсь но пӧйшур инстинктъёслэн дунне вискыосы выйытэ. Геройёс — кӧлон интыын улӥсьёс, асьсэды ыштэмъёс но чылкак «пыдэсаз» лэзькемъёс - асьсэлэн чигиськеменызы жалян гинэ кылдыто. Постановщик геройёслэн пуш дуннезылы саклык висъя. Отын чурыт, кудӟыса вожпотон сяна, улэ «зарни кар» но «шонер музъем» вылэ дӥсьтӥсьтэм осконлэн гыбдась тылыз. Но удалтоз-а соослы улонзэс воштыны, уз пӧрмы-а малпанъёссы мӧзмонлы гинэ? Пулъёслэсь, кортлэсь, небыт шудонъёслэсь декорациос но туала улонлы тупась но геройёслэсь пӧйшур сямзэс возьматӥсь костюмъёс, кылдытэмын суредасьлэн Дмитрий Разумовлэн эскизъёсызъя, сюлэмшугъяськытӥсь мылкыдъёсы пыӵам крезьгурез крезьгурчилэн Александра Микаелянлэн - ваньмыз атмосфера кылдытон понна ужа но учкисез югдурез жаляны мылкыд сётэ. Спектакль зэмлыко но мур пӧрмиз! Артистъёс огшоры гинэ ӧз шудэ, асьсэ персонажъёссылэн историосазы улӥзы, туж зэмлыко! Премьераен сюлмысьтымы ӟечкыласьком спектаклез пуктӥсь командаез, таланто артистъёсты, театрысь цехъёсын но подразделениосын вань ужасьёсты, кудъёсыз поттӥзы та мур, сюлме пырись но атмосферной спектаклез! Сӥзиськомы ваньзылы творческой мылкыд, быронтэм кужым но выль кичӧлтонъёс, нош спектакльлы кема сценической улон! 95-тӥ сезонмы ворсаськиз! Адӟиськомы вуоно сезонын капчи мылкыдын, бадӟым планъёсын но ӟечезлы осконъёсын! Выльысь пумиськытозямы!

30.06.2026 г.

«Алые паруса» яр дурын лопыръяськиз

29-тӥ инвожое ӝытазе Удмурт Элькунысь кун йӧскалык театр Иж прудлэн яр дураз «На родине П.И. Чайковского» искусствоосъя фестиваль улсын «Алые паруса» мюзикл возьматӥз. Туэ Удмурт театр нырысьсэ пыриськиз бадӟым ужрадэ. Спектакльын рольёсты шудӥзы Наталия Буранова (Ассоль), Константин Никитин (Грэй), Сергей Наговицын (Меннерс-младший), Удмуртиысь калык артист Вячеслав Красноперов (Эгль), Удмуртиысь калык артист Игорь Моисеев (Лонгрен), Удмуртиысь дано артистка Елена Сунцова (Меннерслэн кышноез, Анай), Удмуртиысь калык артистка Валентина Моисеева (Маяклэн кузёез), Удмуртиысь калык артист Геннадий Бекманов (Священник), Роман Болтачев (Меннерс-старший), Удмуртиысь калык артист Александр Баймурзин (Скрипач) но театрысь артистъёс. Таиз возьматон актёръёслы но театрын ужасьёслы аспӧртэмлыко луиз. Со мылкыдэз ӝутонэн герӟаськем огшоры тулкымъяськон гинэ ӧз луы, туж бадӟым кылкутонлы пӧрмиз. Выль площадка, выль технической куронъёс, выль быгатонлыкъёс. Режиссёр-постановщик Алексей Ложкин постановкаез выль куронъёслы чӧлскыса тупатӥз: историез юнгес, яркытгес но мылокыдогес карон понна, сцена вылын декораци сяна, мультимедийной сценография кылдытэмын вал: действие бадӟым видеопроекциос дыръя радъяськиз, нялтас вераса, сое дасяны юрттӥз ИИ. Нош сцена вылын спектакль мыныку, ву вылтӥ льӧль парусъёсын тӧдьы яхта гылӟиз. Синмаськытӥз но оскытӥз кадь со, Ассольлэн малпанэз зэмзэ но быдэсмоз но со «принцен ӵош шунды ӝужан палась чилясь шаере кошкоз, отын сое кизилиос инмысь васькыса лыктэменыз ӟечкылалозы». Куазь шоры учкытэк, спектакль 3 сюрслэсь ятыр учкисьёсты люказ. Котькуд кыл, кырӟан, эктон нош ик усьтӥськон кадь чузъяськиз но сюлэмъёсы кылиз. Кырын ортчем возьматон - Удмурт театрысь коллектив понна нош ик быгатонлыксэ эскериз но учкисьёслы яркыт мылкыдъёс кузьмаз но огинэ огазеяз. Ми сюлмысь тау шуиськомы вань учкисьёслы та ӝытэз шумпотонэн но шунытэн тырмытэмзы понна. Туспуктэмъёс Удмурт Элькунысь кун йӧскалык театр но Евгений Князев

26.06.2026 г.

«Алые паруса» кырын возьматэмын луоз!

Удмурт театр «Алые паруса» мюзиклэз (16+) кырын возьматоз нырысьсэ. Та экспериментэз но выль опытэз улонэ пыӵатьыны луонлык кылдӥз «На родине П.И. Чайковского» искусствоосъя фестивалез радъям улсын. Та ужрадэ театр нырысьсэ пыриське. Выль инты постановкае витьымтэ шорысь аспӧртэм воштӥськонъёс пыртоз, нош сое азьвыл адӟылэм учкисьёслы выль мылкыд кузьмалоз. Сюжетлэн шорсюлмыз - Ассоль но Грей, соослэн улон сюрессы пӧртэм югдуръёслы пумит герӟаськемзы. Пичи дырысен тодмо мадёс возьматэмын выль сямен ке но, валтӥсь малпанэз вошъяськисьтэм – яратонлы оскон но паймымон учырез витён. Кылыз: ӟуч Спектакль возьматэмын луоз 29 инвожое 21 часын набережной сцена вылын Пыронэз эркын. «На родине п.И. Чайковского» искусствоосъя 69-тӥез фестиваль Удмуртиын 25-тӥ инвожоысен 5-тӥ пӧсьтолэзёсь ортчоз. 2026-тӥ арын Россиысь одӥгез тужгес вашкалаез крезьгуро фестиваль нырысьсэ выль форматэн ортчоз, крезьгурез, театрез, туала искусствоез но гастрономиез огазеялоз.

Все новости