«Милемлы но одно ик шуд кулэ,

Лобан понна, шӧдон понна…»

Кызьы оген улӥсь пересь кышномуртлы бызён понна воргоронэн тодматскыны? Валамон ни, брачной агентсво пыр. Вазиське отчы карттэк кылем пересь актриса Анастасия Петровна – Мальвина сузэрезлы карт утча. Сузэръёс вуоно эмеспиез витё, но вераськем дыре нырысь ик воксё мукет адями вуэ.

Паймымон ненег но сюлэмез вырӟытӥсь та серемес учыр асьме улон, дырлэн ӝог ортчемез, пересьмон но оген улон, яратонэз утчан но котькыӵе арескын шудо луонлы оскон сярысь.

Пуктӥсь режиссер В.И. Сафонов: «Автор пьесазэ комедия жанрен гожтэм, соин ик сое ӵемысь комедиез сямен пукто. Но вань на та пьесалэн мукет палыз, кудӥз малпаськыны куре улон сярысь, асьме адямиос, пересьёс но егитъёс сярысь. Нырысь учконо ке, спектакльын номыр но уг луы кадь, огшоры учыр, кудӥз котькуд адямилэн улоназ луыны быгатэ. Но татын югдур озьы берыктӥське, серекъялод но, бӧрдод но, валантэм учыре шедем адямиос понна сюлмаськод но. Та спектакль синвуозь вуттэ, соин ик мон ас поннам жанрзэ йӧспӧртэм комедия шуысал».

Туала авторлэн Андрей Ивановлэн «Божьи одуванчики» пьесаез Владимир Сафонов режиссерлы луонлык сётӥз огазе люканы удмурт сценалэсь ветеранъёссэ, кудъёссэ тодо но ярато Элькунамы но, солэн палэназ но.

Спектакль мынэ ӟуч кылын 2 час.