Штангуртысь Лодига Семон асьсэ гуртын ик тымет возе. Нокинлы но, уксё тырытэк, чорыганы уг яра. Тымет дурын уй но нунал - Семонлэн медъям возьмаськисьёсыз, Москваысь гужем каникулъёсы бертэм студентъёс Сократ но Мичурин. Одӥг нуналэ Штангуртэ чорыганы вуэ прокуратураын ужась Василий Еремеев. Коньдон тырытэк чорыгакуз, со шӧдыса ик уг вутты, кызьы машинаезлэсь питранъёссэ пасяло но фараоссэ пильыло. Еремеев йыртэмасьёсты утчаны кутске. Семонлэн пиез, Славик, клубын ужась, мукет сюлмаськонъёсын улэ. Солэсь “Штангурт чеберай” ансамбльзэ Брангуртэ фестивале отё. Но тросэз кырӟасьёсыз яке кӧто луэмен, яке мукет гуртэ быземын. Аслаз сюлмаськонъёсыз Семонлэн атаезлэн, Педорлэн. Со бускель коркась Орина песянаен кузпалъяськыны малпа. Нырысь, тазалыксэ юнматон понна, курортэ дэриен эмъяськыны ветлоно кариське. Нош Варзи-Ятчие мыныны уксёез ӧвӧл: вань пенсиез пиез киын. Но Семон ӵапак со вакытэ шузиме ...

Спектакль мынэ 1 час 45 минут удмурт кылын, ӟуч кылэ синхрон амалэн берыктыса.