Ватка выжылэн тӧроез, удмурт батыр, Донды, аслаз Идна, Гуръя, Весья но Зуй батыр пиосыныз ӵош Чупчи котыре ӝутӥз бадӟым каръёс. Озьы кылдӥз пичи эксэйлык, кудӥз ас кунгожёсаз туж сэрыт ӝутылӥз возьмась каръёс но озьы ик ӝог усьтӥз артысь но кыдёкысь кунъёсы вузаськон сюресъёс. Но вань вал на та эксэйлыклэн «аслаз ляб интыез» – со артэ музъемъёсысь Калмез выжы, кудӥз интыяськемын вал Кильмезь котырын но туж трослы бере кылемын вал туж ӝог азьлантӥськись ваткаослэсь. Калмезъёс тросгес дырзэс ортчытъязы пӧйшуран удысын, бусыоссы но пудо-животъёссы котырын, соин ик кужмо ожчиоссы луымтэысь, ялан тэльёсы но нюръёсы пегӟыло вал таланы лыктэм тушмонъёслэсь. Соин сэрен калмез музъем пыртӥ шӧдтэк шорысь ваткаос доры но потыло вал со таласа ветлӥсь тушмон уллёос. Кыдёке адӟись эксэй, Донды батыр, та кайгуослы пум поныны малпаз, калмезъёсты но ваткаосты одӥг тӧролыке огазеяса. Со понна со аслаз покчи пиезлы, Зуйлы, кышно вайиз калмезъёслэсь вуоно тӧрозэс, Эбгаез, бӧрысь соослэсь пизэс кык калыкез огазеясь тӧр пуконэ пуктон понна. Но ог-огзэс мурт карись кык вашкала сямъёс гурезьёс кадь ӝутскизы та кык калыкъёс вискы, ӧз лэзе Донды батырлы аслэсьтыз малпанзэ сэрыт быдэстыны. Ӵапак та ик луэ бадӟым кайгуосты вайись мугез «Эбга» эпической драмаын. Автор туж зэм но оскымон возьматэ, кыӵе югдуре, кыӵе исторической вуко кӧос улэ но кыӵе быръёнъёс азе султэмзэс Эбгалэсь, Зуйлэсь, Дондылэсь но соос котырысь адямиослэсь. Та быдӟым карлуд шорын ваньмыз кикур вылын кадь. Драма туж яркыт возьматэ, кызьы адямиослэн шуак кылдэм ляблыкъёссы яке малпатэк, ӝог лэсьтэм ужъёссы тияло асьсэлэсь гинэ ӧвӧл мукетъёсызлэсь но лул инъетъёссэс. Кин соос пӧлысь зэм, кин янгыш, учкись ачиз быръёз, но огез тодмо – ваньмыз мар возьматэмын драмаын, котькуд часэ, котькуд минутэ, котькуд секундэ асьмелэн но али улонамы ортче…

Спектакль мынэ 2 час удмурт кылын, ӟуч кылэ синхрон амалэн берыктыса.