2-тӥ шуркынмонэ Удмурт театрын ортчиз Удмурт Элькунысь калык артистлэн Александр Баймурзинлэн Юбилей ӝытэз. Аслэсьтыз юбилейзэ Баймурзин пусйиз сцена вылын. Нырысь ик учкисьёслы возьматэмын вал «Эмезь кисьмаку» тунсыко комедия, кытын Александр Дмитриевич быдэстӥз Африканлэсь рользэ. Собере кутскиз ӟечкылан люкетэз. Ӝытэз нуиз театрысь артист Вячеслав Красноперов. Сцена вылысен артистлы ӟечкылан кылъёссэс веразы театрлэн кивалтӥсез Андрей Ураськин, «Удмурт Кенешлэн» президентэз Татьяна Ишматова, Удмуртиысь МЧС валтӥсь управленилэн кивалтӥсез Петр Фомин, УР-ысь СТД-лэн председателез Александр Мустаев, Пичи Пургаысь иськавын-бӧлякъёс, артистъёс, эшъёсыз но артистэз гажасьёс. Та ӝытын ваньмыз вал кадь – шуныт кылъёс, кырӟанъёс, тодэ ваёнъёс, сяськаос но туж зол кичабонъёс!

Ӟечкыласькомы тӥледыз, гажано Александр Дмитриевич! Юн тазалык, шудбур, выль рольёс но уно вормонъёс сӥзиськомы!