Туннэ котырес лыдпуссэ пусъе Удмурт театрысь актер, Россиысь дано артист, Удмуртиысь калык артист Вячеслав Байков.

Гажано Вячеслав Петрович, сюлмысь ӟечкыласькомы Тӥледыз сӥё-дано юбилееныды! Сӥзиськомы юн-юн тазалык, шумпотон, шудо-буро улон! Театрын но гожъяськон удысын кутсконъёсты котьку но азинлыко но пайдаё мед луозы! Та чебер нуналэ вань сӥзем ӟеч кылъёс одно ик мед быдэсмозы!

Вячеслав Петрович вордскиз Алнаш ёросысь Выль Утчан гуртын. Москваысь Щукин нимо театральной училищеез (институтэз) быдтыса, 1973-тӥ арын со Ижкаре бертӥз. Со дырысен Удмурт театрлэн сцена вылаз ӟуч но удмурт классикая но туала спектакльёсын 200-лэсь трос рольёс шудэмын: Капыръянов («Атас Гири»), Пери («Эш-Тэрек»), Пугачев («Гаян»), Акмар («Вуж Мултан»), Дикой («Гроза»), Колупанов («Жениха вызывали, девочки?») но мукет. Вячеслав Петрович режиссёр удысын но ассэ эскере, серемес веросъёсты кылдытъян бордын тырше, газет-журналъёсын печатлаське. Со сяна, артист кино дасянэ но пыриськылӥз, пӧртэм фильмъёсты удмурт сямен чузъяськытӥз.