«Бадӟым гастрольёс. Улосвылъёс» федерал программа улсын шуркынмонэ Удмурт театрысь артистъёс куинь спектакльёссэс Йошкар-Олаын но Кудымкарын возьматозы. Нош коньывуонэ но шуркынмонэ Коми-Пермяк округысь драмая М. Горький нимо йӧскалык театр (Кудымкар) но Марий Элысь драмая М. Шкетан нимо йӧскалык театр (Йошкар-Ола) асьсэлэсь ужъёссэс Удмуртиысь йӧскалык театрлэн сцена вылаз возьматозы.

Удмуртиысь театрлэн гастрольёсыз Марий Элын кутскозы. 11-тӥ шуркынмонэ театрлэн валтӥсь режиссёреныз Алексей Ложкинэн пуктэм «Эрико яратон» комедиез возьматозы. 12-тӥ шуркынмонэ пор пиналъёс «Царевна-Лягушка» учкыны быгатозы.

25-тӥ но 26-тӥ шуркынмонэ Удмуртиысь йӧскалык театрлэн гастрольёсыз Коми-Пермяк округын азьланьтӥськозы. Кудымкарын улӥсьёслы возьматэмын луоз «Алые паруса» мюзикл но пиналъёслы «Царевна-Лягушка» выжыкыл.

Вераны кулэ, спектакльёсты бырйыку Удмуртиысь театр Кудымкарысь но Йошкар-Олаысь театръёслэсь аспӧртэмлыксэс но репертуарзэс лыдэ басьтӥз, учкисьёслы возьматон понна тужгес устооссэ постановкаосты бырйиз.

Коньывуон пумын вуоз Коми-Пермяк театр. 28-тӥ коньывуонэ Николай Колядалэсь «Уйди-уйди» (16+) трагикомедизэ ӟуч кылын возьматозы, сое пуктӥз Пермь шаерлэн лулчеберет но искусство удысысь премиезлэн лауреатэз Станислав Мещангин. 29-тӥ коньывуонэ пиналъёслы «Гадкий утёнОК» (9+) хип-хоп skazka ӧръя пуктэм спектакль ӟуч кылын возьматозы. Пуктӥз сое Москваысь режиссёр Анна Потапова. Спектакльын шудозы театрысь егит артистъёс. Соос асьсэос та выжыкыллы рэп амалэн кырӟанъёс гожтӥзы.

11-тӥ шуркынмонэ Марий Элысь театр Владимир Гуркинлэн «Любовь и голуби» (12+) спектакленыз тодматоз, со пор кылын пор шӧмын пуктэмын. 12-тӥ шуркынмонэ Удмуртиысь учкисьёс «В некотором царстве…» (6+) крезьгуро спектаклез ӟуч кылын адӟозы.

ВАТСАН

«Бадӟым гастрольёс» огъяросси программа ньылетӥ арзэ ортчытӥське ни. Россиын улӥсьёс оштолэзьысен шуркынмонозь быдэс кунысь театръёслэсь устооссэ спектакльёссэс адӟыны быгато — учкисьёслы кельшемъёссэ но, чылкак выль ужъёсты но. Гастрольёс Россиысь лулчеберетъя министерство но Гастроль ужлы юрттонъя федерал центр юрттэм улсын радъясько.