Удмуртиысь йӧскалык театр нырысьсэ мюзикл пуктыны басьтӥськиз. 26-тӥ инвожое Йӧскалык театрын усьтэм репетеция ортчиз. Александр Гринлэн тросэзлы тодмо луись яратон но лемлет малпан сярысь кузьверосэз мюзикл жанрын чылкак выль сямен чузъяське. Дунне чутрак кыклы люкемын — сьӧд но тӧдьы, шонергес, пурысь но лемлет. Одӥгаз - сур кисьтӥське но туннэ нуналэн гинэ улон малпан кузёяське. Мукетаз — Ассольлэназ — лякыт но югыт, кыдёкысь лыктӥсь парусъёс понна оскон тыл ӝуатӥське.Татын Ассоль — паймымонозэ возьмаса чигтӥськон калэ вуэм, лек дуннеын ассэ утьыны тыршись. Нош Грей — выжыкылысь принц ӧвӧл, со улонэз адӟем, воштӥськонъёсты возьмась зарезь капитан. Вераны кулэ, «Алые паруса» мюзикл Россиысь лулчеберетъя министерство юрттэмен пуктэмын. 2017 году йӧскалык театр «Культура России» нимысьтыз федерал программая грант утӥз. Таӵе луонлык сётӥз ӧтьыны палэнысь ӧнерчиосты. Декорациосты кылдон бордын ужаз тодмо модельер Олег Ажгихин, декорациос дасян бордын - архитектор Касим Галиханов, эктонъёсты пуктӥз балетмейстер Петр Овчинников, крезьгурзэ тупатъяз Иван Котельников. Озьы ик, артистъёсын нимысьтыз ужазы кырӟанъя дышетӥсь Валерий Каракулов, эктонъя дышетӥсь Полина Лебедева.

Пусъйыны кулэ, спектакль ӟуч кылын пуктэмын.

Спектакльлэн премьераез 28-тӥ но 29-тӥ куартолэзьлы чакламын.

Билетъёс вузасько ни.

<iframe width="560" height="315" src="https://www.youtube.com/embed/z4RuOUG1Ht8" frameborder="0" allowfullscreen></iframe>