«Яратон уг пересьмы» - кык ёзен крезьгуро комедия. Спектакль пыр учкисьёсмы адӟозы но валалозы – мар карыны быгатэ яратон!

Адямиослэн кусыпъёссы усьтӥсько: эшлыко, ӟеч сямо, вазиськись, мылысь-кыдысь усьтэм сюлмысь луо. Яратон адямиез умоез пала воштэ, кужым сётэ. Юнме оз вералэ, дыр, - «Яратон арлыдзэ уг лыдъя»! Куинь яратӥсь паръёс ог-огзылэн сюлэмъёсазы сюрес шедьто. Яратӥсьёс куинь пӧртэм вакытысь ӵыжы-выжыос луо: егитъёс, шоро-куспо но мӧйыос. Тон но, яртоно учкисьмы, одно ик синмаськод та спектакльлы. Спектакльлы гинэ ӧвӧл, выльысь синмаськод кемалась сюлэме пырем актеръёслы, кудъёсыз шудо тон понна гинэ!

Ольгаез шудоз Марина Самсонова – яркыт, быгатӥсь, аспӧртэмлыко актриса. Учкисьёсмы ярато но тодо Маринаез таӵе рольёсъя : Софья («Горе от ума»), Настя Грачёва («Жингрес сӥзьыл»), Соня («Ой, чебер нылъёс»), Даша («Лемлет Исьтапанлэн зарниез») но мукетъёсыз.

Лекимлэсь рользэ шудоз Геннадий Бекманов – Удмурт Элькунысь калык артист, таланто, шумпоттыны быгатэ калыкез сцена вылын шудэменыз но, кырзанъёсыныз но. Котькин тодэ Геннадий Ивановичез таче рольёсъя: Миша (Матронлэн егит картэз, яке Атас Гири - 2 ) Ляпкин-Тяпкин («Ревизор»), Губернатор («Мертвые души»), Его Величество Глупый король («Бременские музыканты») но мукетъёсыз.

Петырлэсь рользэ шудоз Сергей Пислегов – Удмурт Элькунысь сӥё-дано артист! Яркыт, таланто актёр. Учкисьёсмылы тодмо таӵе рольёсъя: Григорьев Акмар («Мултан уж»), Кулигин («Гроза»), Иван Игнатьич («Капитанская дочка»), Прокурор («Мертвые души») но мукетъёсыз.

Тодад возь, гажано учкисьмы, одӥг спектакль котьку быгатэ усьтӥськыны выль буёлъёсын, нош но нош учкыкуд – одно ик шедьтод маке выльзэ, номырлы кельшисьтэмзэ.

Матысез спектакль 30 КОНЬЫВУОНЭ 18 часын. Билетъёс быгатӥськоды басьтыны театрлэн билет вузан кассаяз (3412)78-45-92, 8-901-860-55-19, но сайтысьтымы https://quicktickets.ru/izhevsk-nacionalnyj-teatr/s1756 .

Ужа Пушкинской карта.

Спектакль мынэ 2 час 10 минут, удмурт кылын, ӟуч кылэ синхрон амалэн берыктыса.