Туннэ, 20-тӥ гудырикошконэ, УАССР-ысь калык артисткалы Васса Кирилловна Виноградовалы вордскемез дырысен тырмысал 110 ар! Васса Кирилловна вордӥськиз 20-тӥ гудырикошконэ 1909-тӥ арын Алнаш ёросысь Удмурт Гондыр гуртын. 1927-тӥ арын Алнашысь улыны выжиз Ижкаре. Ужаны интыяськиз Ижысь машиностроительной заводэ. Шутэтскон вакытаз вуттӥськылӥз Удмурт клубын шудыны-вераны. Огаз концертын солэн жингрес куараезлы синмаськизы Кузьма Ложкин но Игнатий Гаврилов. Егит нылашез ас доразы - Удмурт театре - ужаны ӧтизы. Аспӧртэмлыко быгатонлыкезлы луыса, Васса Кирилловналэн театр удысъя нимысьтыз дышетскемез ӧй вал ке но, соку ик учкисьлэсь сюлэмзэ ас палаз берыктӥз, рольёссэ туж вольыт быдэсъяз. 30 ар театрын ужамез куспын Виноградова пӧртэм валтӥсь рольёсты быдэстӥз - Наталь («Зӥбет зурка»), Чабъя («Камит Усманов»), Анна Андреевна («Ревизор»), Тюливить («Сюан»), тетушка Ажан («Аршин мал алан»), Юбера («Аннок»), Зоя Кабышева («Вуж юрт») но мукет. Васса Кирилловна, спектакльёсын шудэм сяна, Клавдия Гаврилова актрисаен но берлогес Нина Бакишаеваен ӵош кырӟалляз-вералляз . Виноградовалы 1940-тӥ арын УАССР-ысь дано артистка но 1952-тӥ арын УАССР-ысь калык артистка ним сётэмын