- Милям та удмурт испанецмы, - пальышаса вералляз со сярысь тодмо режиссер но артист Кузьма Ложкин. Зэмзэ но, Удмурт драмтеатрысь, артистлэн, режиссерлэн УАССР-ысь дано артистлэн Лазарь Иосифович Перевощиковлэн тусбуяз гинэ ӧвӧл, пӧсь сямаз но Лопа де Вега испанской драматурглы тупасез вань шуыса троссэз пусйылӥзы.

22-тӥ шуркынмонэ солы таырмысал 105 арес (22.11.1912-26.02.1984).

Вордскиз со Дэбес ёросысь Уйвай черкогуртын бадӟым крестьян семьяын. Ижевскысь музыкально-театральной техникумез йылпкмъяса, 1934-тӥ арын Удмурт театрын артист луэ. 1941-тӥ арын со кошке ожмаскыны, нош война бырем бере со нош ик Удмурт театре берытске. 1951-тӥ арын со культура дворецысь Удмурт калык театрлэн режиссёрез луэ. Отысь ик со пенсие кошке.

30-50-тӥ аръёсы Л.И.Перевощиков Удмурт драмтеатрын сю пала пӧртэм синмаськымон, яркыт но оскымон образъёс кылдытэ - Хлестаков («Ревизор»), Федотов («Геройёс»). Алангасар («Сюан») но мукет.

30-тӥ аръёссы кужымзэ эскере драматургия удысын. «Вуж тодмоос» драма гожтэ. Война бере но со гожъяськонзэ уг палэнты. 50-тӥ аръёсы Лазарь Иосифовичлэн самой пушъён дырыз вал. Пӧртэм пьесаос гожъялляз, уноез соос пӧлысь сцена вылын улӟылӥзы - «Дуно салам», «Поэтлэн куараез»,«Улэм потэ» П.Блиновлэн романэзъя инсценировкаез.

Лазарь Иосифовичлэсь ужамзэ адӟылэм карылӥз выныз - Удмурт театрысь артист Апполос Иосифович. Таяз арын солы 95 арес тырмысалыз.