Инвожо толэзь 1941-тӥ ар

Со дыре Удмурт театрлэн гастрольёсыз Глазовын ортчизы. Артистъёс сьӧразы вайизы кӧня ке спектакльёс. Труппа вань кужымзэ сётыса ужаз, возьматонъёсты но калык туж умой пумитаз. Огаз шутэтскон нуналэ 22-тӥ инвожое театрлэн коллективез инкуазе шутэтскыны потӥз, Чупчи шур доры. Нуназе пал секыт ивор вӧлмиз: война. Воргоронъёслы военкоматэ лыктыны предписание вуиз. Войнае кошкизы егит актёръёс, театрын ужасьёс, тросэзлы соос пӧлысь бертыны ӧз кылды ни. УАССР-лэн Совнаркомезлэн пуктэмезъя, театр ворсаськиз. Кӧнязэ ке артистъёсты ож тӥрлык поттон заводэ ужаны келязы.

1942-тӥ ар

1942-тӥ аре 20-тӥ коньывуонэ Удмурт театр нош ик ужаны кутскиз. 7-8 мурт К.А.Ложкинлэн кивалтэмез улсын пичи концертной программаен колхозъёсы потаз. Ӝоген вань актёръёс огазе люкаськизы, уже кутӥзы на кӧня ке выльёссэ но. Ужан интыез луиз Алнаш черкогурт но Можга город.

Тодэ ваёнъёс…

Кузьма Алексеевич Ложкин, артист но режиссёр:

«1942-тӥ арын Удмурт театр выльысь ужаны кутскиз. Одӥг ар ӵоже со Алнашын ужаз. Бадӟымесь спектакльёсты пуктылыны кужымез тырмымтэен, нырысь пал со концертъёс гинэ возьматъялляз. Артистъёс, колхозъёсы мыныса, концертъёсынызы гурт калыклэсь мылкыдзэ ӝутылӥзы Горд Армилы юрттонэз кужмоятыны. Кӧня колхозъёстӥ ми ортчим! Алнаш, Грахово, Бемыж районъёсын одӥгаз но колхозэ ми ветлытэк ӧм кыле, дыр. Милесьтым кырӟанъёсмес, эктонъёсмес, пичиесь спектакльёсмес колхозникъёс но колхозницаос гажаса пумиталлязы. Удмурт артистъёс удмурт гуртъёсын самой дуно куноос луизы».

Нина Карповна Байсарова, артистка:

«Гуртэ лыктӥськод, нош клуб ӧвӧл. Концертэз школаын возьматыны куро, нош школа шуонзы сарайлы укша. Куддыръя куштӥськем юртъёсын но куашканы кутскем черкъёсын концертъёсмес ортчытъям. Костюмъёсын бадӟым чемоданъёсты асьме вылын нуллӥм, куд-ог учыръёсы вал интые скалъёсты кыткылӥм. Нош концерт дыръя нылпиослэн ымныръёсысьтызы капчи мылкыдзэс, пальпотонзэс, мӧйыослэсь синвуоссэс адӟыса, сюлэм шумпотонэн пачылмылӥз. Ведь милям ужмы адямиослы улыны юрттӥз…»

1943-тӥ ар

1943-тӥ арлэн пумаз театрез Можгае нуо. Табере спектакльёс Можга РДК-ын ортчылӥзы. Театрлэн репертуараз войналы сӥзем пьесаосъя спектакльёс пыризы: А.Арбузовлэн «Бессмертный», К.Симоновлэн «Русские люди», Ф.Кноррелэн «Встреча в темноте» ужъёссы но мукет. Со сяна, ӟуч классика но пуктылӥськиз, кылсярысь, А.Островскийлэн «Бедность не порок», «Без вины виноватые» пьесаосъя спектакльёс. Удмурт кылын пуктӥзы И.Гавриловлэсь «Аннок» драмазэ. Со сяна, труппа колхозъёсы концертэн потамысь ӧз дугдылы. Война куспын театрысь артистъёс колхозъёсын, госпитальёсын, райцентръёсын куать сю концертъёс но спектакльёс сётӥзы.

1944-тӥ ар

1944-тӥ арын сӥзьыл театрез Иже вайизы. Солэн постановкаосыз нылпи клубын ортчылӥзы. Удмурт театрлэн спектакльёсыз ар но ӝыны ӵоже отын мынӥзы.

1945-тӥ ар

1- тӥ южтолэзе 1945-тӥ арын «Вуж Мултан» спектакльэн премьераез ортчиз. Та арын ик, 1945-тӥын, театр Россиысь йӧскалык театръёс куспын ортчись вожвылъяськонэ пыриськиз. Отын К.Симоновлэн «Русские люди», М.Петровлэн «Вуж Мултан» ужъёссыя спектакльёс возьматэмын вал. Войнае кошкизы егит актёръёс, театрын ужасьёс, тросэзлы соос пӧлысь бертыны ӧз кылды ни. Театрлэн фойеаз ожын бырем артистъёслы данъян пул ошемын: Бобров Филипп Михайлович, Самсонов Иван Петрович, Иванов Виталий Кузьмич, Харин Михаил Федосеевич, Поздеев Иван Иванович, Тугбаев Александр Иванович, Растягаев Николай Андреевич, Хватов Николай Михайлович, Вдовенко П.В., Лямин Б.К., Седов А.А., Торшин А.И., Шкляев И.К.

Трос куректонъёс, шуг-секытъёс пыртӥ потоно луиз театрлы война аръёсы, но со ӧз сётскы, ӧз чалмытскы.