Удмурт но Алтай Йӧскалык театръёслэн вошъяськон гастрольёссы йылпумъяськизы. Гастрольёс Россиысь лулчеберетъя министерстволэн но Гастрольёслы юрттэт сётонъя федерал центрлэн «Бадӟым гастрольёс» федерал программа улсын радъяськизы. 12,13, 14 куарусёнэ Горно-Алтайскын удмурт артистъёс куинь спектакльзэс возьматӥзы — «Чупчи крезь» эпос драма, «Алые паруса» мюзикл, но «Морозко» выжыкыл. Нош Алтайысь йӧскалык театр Ижкарын 26, 27 но 28 куарусёнэ Удмуртиысь учкисьёслы «Чейнеш» драма , «Ханума » крезьгуро комедия но нылпиослы «Шелковая кисточка» выжыклзэ возьматӥз. Учкисьёс вылӥ дунъязы театръёслэсь ужъёссэ. Таче гастрольёс портэм театръёсын валче ужаны, будыны луонлык сёто: выль площадкаос, выль ужъюлтошъёс, выль учкисьёс. Берпуметӥ нуналаз алтайысь эшъёсмы К.Герд нимо Йӧскалык музейын тодматскизы удмуртъёслэн историенызы, сям-йылолъёсынызы но культураенызы. Нош ӝытазе алтайысь эшъёсмы «Легенды Горного Алтая» концерт возьматӥзы. Та ужрадэ Бабушки из Бураново коллектив но пыриськиз.