13-тӥ шуркынмонэ Удмурт театр бертӥз Марий Элысь. Драмая М.Шкетан нимо йӧскалык театрлэн сцена вылаз 11-тӥ но 12-тӥ шуркынмонэ театрмы возьматӥз аслэсьтыз ужъёссэ - «Эрико яратон» комедия но «Царевна-Лягушка» нылпи выжыкыл. Со дыре ик, Удмурт театрлэн сцена вылаз пор артистъёс возьматӥзы «Любовь и голуби» комедиез но «В некотором царстве…» крезьгуро нылпи выжыкылэз. Пусйыны кулэ, йӧскалык театръёслэн вошъяськон гастрольёсы ортчизы Россиысь лулчеберетъя министерство но Гастроль ужлы юрттонъя федерал центр юрттэмен «Бадӟым гастрольёс. Улосвылъёс» федерал программа улсын. Удмурт коллективез Марий Элын туж шуныт пумитазы. Пор артистъёс пумитазы куно кырӟанэн, Мари-Турекской ёросын землячествоенызы кивалтӥсьлэн воштӥсез В.Г.Ершов ӟеч кылъёссэ вераз, нош Карлыганысь «Зордон» удмурт ансамбльзы кырзанъёсын-эктонъёсын шулдыртӥз. Тау карон кылъёссэ вераз Удмурт театрлэн валтӥсь режиссёрез Алексей Ложкин. Вераны кулэ, Удмурт но Марийской театръёсты кемалась ни эшъяськон кусыпъёс герӟало. Озьы, удмурт но пор кык йӧскалык студиосысь артистъёс быдтӥзы Москаваысь Щепкинской вузэз. Нош котькуд кык ар ортчыса Удмурт артисъёс вуыло Йошкар-Олае финно-угор калыкъёслэн «Майатул» театр фестивалязы. Марий Элын асьме спектакльёсмес учкисьёс туж умой пумитазы. Али Йӧскалык театр дасяське Кудымкаре. Отын 25-ти но 26-ти шуркынмонэ коми-пермякъёслы возьматэмын луоз «Алые паруса» мюзикл но «Царевна-Лягушка» выжыкыл.