Тодӥськоды-а тӥ, 87 ар талэсь азьло Удмурт театр нырысьсэ ӟуч классика борды басьтӥськиз шуыса. 26-тӥ оштолэзе 1933-тӥ арын «Ревизор» спектакльлэн премьераез ортчиз. Постановка бордын тыршиз егит режиссёр но актёр К.А.Ложкин, удмурт кылэ берыктон бордын ужаз кутскись драматург И.Г.Гаврилов. Артистъёслы секыт ке но вал, спектакль дасян бордын сюлмо ужазы, тыршизы. «Классической пьесаос туж внимательной, туж серьёзной ужамез куро. Татын тодыны кулэ эпохаез, историез, бытэз но мукетъёссэ» - тодаз вайылӥз Хлестаковлэсь рользэ быдстӥсь артист Л.И.Перевощиков. Но озьы ке но ужзы пӧрмиз. Кызьы гожтӥз К.А.Ложкин, «нырысетӥ спектакль ик возьматӥз, Гоголь но мукет классикъёс сцена выламы мыныны быгато но репертуармес узырмытыны асьме авторъёсын гинэ уг яра».