Туннэ, 20-тӥ гудыркошконэ, гужем шутэтскон бере Йӧскалык театрлэн коллективез нош ик ужаны кутскиз. Бичаськон кутскиз театрлэн кивалтӥсезлэн А.И.Ураськинлэн но валтӥсь режиссёрлэн А.А.Ложкинлэн ӟечкыланъёссы бордысен. Андрей Иванович выль сезонлы творческой планъёсты шараяз. Соос пӧлын выль возьматонъёс но, гастрольёс но, фестивальёсы пыриськонъёс но. Тодады вайытӥськом, куарусён толэзьлэн кутсконаз театрмы Алтай Элькунэ гастрольёсы кошке, кудъёсыз кыстӥськозы 12-тӥ куарусёнысен 14-тӥозь. Толэзьлэн пумаз (26-тӥ куарусёнысен 28-тӥозь) Алтайысь йӧскалык драмтеатр ни асьме дорын спектакльёссэ возьматоз: «Чейнеш» алтай кылын ӟуч кылэ синхрон амалэн берыктыса, «Ханума» ӟуч кылын но нылпиослы «Шелковая кисточка» выжыкыл.

Выль кужымен, лулысь-сюлмысь, бадӟым малпанъёсын, ӝутскем мылкыдын театрмы кутске аслэсьтыз 89-тӥ творческой сезонзэ, кудӥз, оскиськом тунсыко луоз учкисьёслы но, коллективлы но.