22-тӥ куарусёнэ Удмуртиысь дано артистлэн Сергей Семонович Марковлэн вордӥськемез дырысен 70 арес тырмысал

(22.09.1947 – 10.09.1987).

Вордскиз со Алнаш ёросысь Кузёбай гуртын. Школаез йылпумъямез бере, Ижысь металлургической заводын ужаны кутскиз. Огпол театральной училище удмурт студия усьтӥськон сярысь газетысь ялонэз синйылтӥз но ас быгатонлыксэ утчаны малпаз. Сергей оскиз пырыны быгатоз шуыса. Школаын дышетскыкуз ик солы кельше вал художественной самодеятельносте ветлыны. Конкурсной экзаменъёссэ сётыса, 1968-тӥ арын со луиз Щукин нимо театральной училищелэн студентэз. 1973-тӥ арын дышетсконзэ быдытыса Удмурт театре берытскиз. Сцена вылын нырысетӥ вамышъёссэ лэсьтыкуз ик, быгатыса но синмаськымон шудӥз социальной геройёслэсь рольёссэс. Сергей Семёнович куамынлэсь ятыр спектакле пыриськиз, аспӧртэмлыко образъёс кылдытӥз. Соос пӧлын - Любим Торцов («Бедность не порок»), Шаманов («Прошлым летом в Чулимске»), Деми («Улэм потэ») Бутаров («Бугырес тулыс») но мукет. Нош «Лысву сямен уг тӧлӟы синкыли» драмаысь Мокей Санька одӥгез яркыт образэз луиз. Кыӵе роль борды гинэ ӧз кутскылы, бадӟым-а, пичи-а, героезлэсь сямзэ котькуд учкись доры вуттылӥз, ас сюлэм пыртӥз поттыса. 14 ар ӵоже Удмурт театрын ужатозяз, Сергей Семенович шӧдскымон пытьы кельтӥз.