24-тӥ шуркынмонэ театрлэн кивалтӥсез Сергей Чирков но валтӥсь режиссёрез Алексей Ложкин Щепкин нимо Вылӥ театральной училищее вуылӥзы. Татын дышетско удмурт студиысь студентъёс, Удмурт театрлэн вуоно профессиональной артистъёсыз.

Нырысетӥ курсын дышетскисьёсын но дышетӥсьёсын вераськемез бере, Сергей Александрович пусйиз, куинь толэзь куспын егитъёс ог-огенызы умойгес тодматскизы но юнгес герӟаськизы шуыса. Актриса но телеведущая Светлана Кибардиналэн юртэмезъя, куд-огез кылзэс но волятӥзы. Дышетскисьёс калыкъёслэн огазеяськонзылы, удмурт кыллы, нырысетӥ курслы дышетскисьёслы сӥзем нуналъёслы дасям театрализованной представлениосысь пӧртэм люкетъёссэ возьматӥзы. Шумотымон, соос пӧртэм ужрадъёсы пыриськемзы пумысь но, озьы палэнын улӥсьёсты Йӧскалык театрен но Удмурт шаерен матэгес тодмато. Соин курслэн кивалтӥсезлэн Дмитрий Козновлэн ӵектэмезъя, егитъёслы удмурт костюмъёс вурэмын луозы.

Нош студентъёсты дышетонэн геӟаськем юанъёсъя кенешизы институтысь ректорлэсь ужзэ быдэстӥсеныз Антон Лещинскиен.

Тодады вайытом, Щепкин нимо Вылӥ театральной училищее (институтэ) пырон экзаменъёс таяз гужеме ортчизы. Выль курс бичаськиз Йӧкалык театрлэсь труппазэ будэтон, солы выль шокчон сётон понна. Таиз тямысэтӥез удмурт студия луэ ни, берпуметӥзэ дышетскыны ыстэмын вал 2009-тӥ арын.