«Васьлей» яркыт комедиез нырысьсэ возьматон дорозь арнялэсь но ӧжыт дыр кылемын ни.

Туннэ артистъёс нырысьсэ костюмъёсын потӥзы. Кылизы на костюмъёс бордын куд-ог ужъёс, но али ик адзиське ни соос вуремын пӧртэм стильёсты чакласа. Васьлей коӵышлэн – яке шонергес, коӵышъёслэн, милям кык составмы – шудо Константин Никитин но Вадим Дмитриев – дӥсьсы туж тупа ГРАНЖ нимо егитъёслэн стильзылы. Артистъёс вылын кесяськем джинсыос, шапкаос, кроссовкиос но юри керттэм кыстӥськем свитеръёс.

Тунсыко адзисько Корка кузёослэн дӥсьсы. Шудо Александр Баймурзин но Кадим Галиханов. Тодады номыр но уг лыкты? Брюки-клеш, бадзымесь яке кузь йырсиё прическаос, цветастой рубашкаос, кузятыса вурем воротникъёс, платформаен пыдкутчанъёс.

Сцена вылын 70-80 –тӥ аръёс.

Нырысь малпамын вал, образъёсты кылдытыны хиппи стилен, но пумен вошъяса, кылизы на стильлэсь куд-ог люкетъёсыз гинэ, кылсярысь, Корка Кузёлэн туганэзлэн юбкаез вуремын сборкаен кузятыса, кус пояссэ вылӥегес ӝутыса.

Аспӧртэмгес луиз латэкслэсь вурем костюмез сфинкс породаысь коӵышлэн Нефертитилэн (арт.Екатерина Яковлева). Образэс копак кылдытыны грим кулэ на, но тае адзыны быгатомы ни премьераын.

Репетициос туж зырдыт мыно. Ужало мизансценаос, иннтонация, движение бордын. Мар пӧрмоз – сое учкисьёсмы адзыны но дунъяны быгатозы 6 но 7 толсуре. Кутсконэз 18 час.30 мин.

Чаклам арлыдыз – 18+ Спектакль мыноз удмурт кылын зуч кылэ синхрон амалэн берыктыса.