Удмурт театрын та вакытэ кысык уж мынэ. Театрлэн валтӥсь режиссёрез Алексей Ложкин «Алые паруса» спектаклез дасян бордын ужа. Та мюзиклэн премьераез чакламын 28-тӥ куарусёнлы. Нуналлы быдэ сцена вылын мыно репетициос. Режиссёр та вакытэ тросгес ужа дэмен сценаос бордын, кырӟанъёсты но эктонъёсты волятэ. Озьы ик сюлмо ужало цехъёс но. Декорация лэсьтӥсьёс котькуд пичи арберилы но саклык висъяло. Художникъёс-бутафоръёс дасяло корабльлэсь пӧртэм люкетъёссэ. Кылсярысь, канатъёс-гозыос пуно. Котькудӥз со гозы-канат думемын зэмос зарезь гердэн. Соослы со ужез нимысьтыз дышетоно луиз. Угось зарезь герд юн но оскымон думемын луыны кулэ, малы ке шуоно, со гозыос кузя артистъёс ветлозы, отысь медаз усе. Монтировочной цехын ужасьёс утыр дась луись декорациез пуктыны дышетско, ваньмыз со чертёжъя мед тупалоз. Ӝоген вань декорация сцена вылын сылоз ни. Собере сое нош ик мастерское нуозы но тырмымтэосыз бордын ужалозы на. Вуриськон цехын но огыр –бугыр. Спектакльын туж трос шудӥсез, озьы ке но, котькудӥзлы нимысьтыз костюм вуриське. Со юрттоз котькуд героез нимысьтыз висъяны но спектакльлы юрттыны. Соин ик режиссёр Алексей Ложкин но костюмъёсъя суредась Олег Ажгихин ӵошен эскеро костюмъёслэсь вуоно премьералы дась луэмзэс.