Парадельфийской шудонъёсты радъян улсын Йӧскалык театрын 12-тӥ шуркынмонысен 15-тӥозь мынозы театр ӧръя вожвылъяськонъёс. Ӵошатсконэ пыризы пӧртэм каръёсысь сӧсыр усточиос - Москвысь, Санкт-Петербургысь, Новосибирскысь, Чайковскиысь, Омскысь, Воронежысь, Ейскысь, Череповцысь но Ижысь. Ӵукнаысен ӝытозь мыно сцена вылын репетициос но спектакльёс, нош фойеын мастер-классъёс ортчо. Кӧня ке нуналлы Удмурт театр огазеяз профессиональной но непрофессиональной артистъёсты, театр удысысь ӧнерчиосты но сӧсыр луэм адямиослы асьсэзыс творчество удысын возьматыны но ог-огенызы вераськыны-кенешыны луонлык сётӥз.