Куартолэзе Удмурт театр гастрольёсын Коми республикае потаз, кудъёсыз ортчизы Россиысь лулчеберетъя министерство но Гастроль ужлы юрттонъя федерал центр юрттэмен «Бадӟым гастрольёс. Улосвылъёс» федерал программа улсын. 18-тӥ но 19-тӥ куартолэзе театрмы возьматӥз аслэсьтыз ужъёссэ - «Алые паруса» мюзикл но «Царевна-Лягушка» нылпи выжыкыл. Тодады вайытом, талэсь азьло оштолэзе Удмурт театрын асьсэлэсь ужъёссэс возьматӥзы Коми йӧскалык театрысь артистъёс. Нырысетӥ нуналаз ик спектакль кутскон азьын сцена вылын тау карон кылъёссэ но азьланяз кусыпъёсты юнматон сярысь осконзэ вераз Удмурт театрлэн кивалтӥсез А.И.Ураськин. Сыктывкарын асьме спектакльёсмес учкисьёс туж умой пумитазы.