11-тӥ но 12-тӥ шуркынмонэ Удмурт Элькунысь йӧскалык кун театрлэн сцена вылаз ортчозы Марий Элысь драмая М.Шкетан нимо йӧскалык театрлэн гастрольёсыз. Та нуналъёсы ик Марий Эллэн караз милям театрмы аслэсьтыз спектакльёссэ возьматоз. Кӧснуналэ, 11-тӥ шуркынмонэ, удмурт артистъёс возьматозы итальян драматурглэн Дарио Фолэн пьесаезъя пуктэм «Эрико яратон» комедиез, нош 12-тӥ шуркынмонэ пиналъёслы «Царевна-Лягушка» выжыкылэз.

Удмуртиысь учкисьёсты Йошкар-Олаысь театр тодматоз аслаз туж тунсыко ужъёсыныз. 11-тӥ шуркынмонэ пор артистъёс возьматозы Владимир Гуркинлэн "Любовь и голуби" комедиеныз. Со мынэ пор кылын, ӟуч кылэ синхрон амалэн берыктыса. 12-тӥ шуркынмонэ адӟыны луоз ӟуч кылын мынӥсь «В некотором царстве…» крезьгуро нылпи выжыкылэз.

Пусйыны кулэ, Удмуртиысь но Марий Элысь театръёс нырысьсэ пырисько вошъяськон гастрольёсы. Таӵе луонлык сётӥз Россиысь лулчеберетъя министерство но Гастроль ужлы юрттонъя федерал центр юрттэм улсын радъяськись "Бадӟым гастрольёс. Улосвылъёс" федерал программа.