Удмурт театр дасяське выль возьматонлы - "АЙНА" спектакльлы. Та Йӧскалык театрлэн историяз нырысетӥез удмурт мюзикл луоз.

Спектакль пуктӥське удмурт поэтессалэн Татьяна Чернова но режиссёрлэн Василий Ушаковлэн пьесазыя. Та ужзэс тупатъяз туала удмурт драматург Сергей Антонов но композитор Анатолий Эркишев. Пуктӥсь группаез но артистъёсты витё кысык нуналъёс. Премьера дасьяське Удмурт театрлэн юбилеезлы.

Вокальной номеръёсты пуктон понна ӧтемын удмурт кырӟась Надежда Уткина. Надежда Эдуардовна тодмо аслаз чылкыт, югыт, аспӧртэмлыко куараеныз. Режиссёрлэн Алексей Ложкинлэн верамезъя, вокальной номеръёсъя постановщикез бырйёнын таӵе манерен кырӟанъёсты быдэстемез валтӥсез луиз.

"Мон азьын пуктэмын таӵе ужпум - материалэз дышетыны но юнматыны, нотаосты артистъёслэн мылыкдынызы герӟаны, эстрадной амалъёсты уже кутыса кырӟанъёсты туалагес карыны. Кырӟаны луэ туала манерен но, академически но. Но ми лыдэ басьтыны кулэ жанрлэсь куронъёссэ, ми тыршиськом мед пӧрмоз мар ке но традиционной но эстрадной вискын. Егит геройёс, арлыдо рольёс - котькудӥзлэн луоз аслаз манерез. Ужмылэн секыт палыз - со дуэтъёсты пуктон, чебер, лад-лад чузъяськонэ вуттон", - вера Надежда Уткина.

Дасяськон ужъёс туж мыло-кыдо мыно. Надежда Эдуардовна вань задор мылкыдзэ сётыса тырше, артистъёслы валэктэ кырӟан амалъёслэсь пӧртэмлыкзэ, эстрадной стильлэсь инъетсэ. Та ваньмыз вакчи дыр куспын юрттоз выль материалэз умойгес тодыны-валаны.

Вашкалазэ но туалазэ герӟан шӧдӥське суредасьлэн Денис Тубыловлэн костюмъёслэн эскизъёсаз но.Стилизовать карем дӥсьёс геройёслэсь сямзэс усьтыны юртозы , спектакльлы матын луись мылкыд сётыны быгатозы. Арня вискын Денис Тубылов режиссёрен Алексей Ложкинэн, валтӥсь суредасен Ольга Моторинаен но вуриськон цехысь ужасьёсын дӥскутъёслэн шонер вурон апӧртэмлыксы пумысь кенешизы, люкетъёссэ эскеризы.

Нырысетӥ удмурт мюзикл - со Удмурт театр понна бадӟым событие, но со дыре ик быгатонлыкез, кужымез бадӟым эскерон.