27-тӥ инвожое Россиысь дано артисткалэн, Удм.Элькунысь калык артисткалэн Нина Петровна Бакишевалэн вордӥськемез дырысен 90 арес тырмысал.

Вордӥськиз со Вавож ёросысь Тыловыл-Пельга гуртын. 1944-тӥ арын йылпумъяз Можгаысь педучилищеез, 1951-тӥ арын - Ленинградысь А.Н. Островский нимо театральной институтэз. Сое йылпумъяса, ужаны кутске Удмурт драмтеатрын. Нина Петровна туж быгатыса шудылӥз пӧртэм калык нылкышноослэсь рольёссэс. Калыклы туж матын луизы анай кылыныз жильыраса вераскись Бакишевалэн удмурт спектакльёссысь геройёсыз, кылсярысь, "Вуж Мултанысь" Наталь но "Аннокысь" Аннок.

Аннок солэн нырысетӥ ролез луэ. Татын со огшоры удмурт нылашлэсь вань сюлэмзэ, пуш дуннезэ усьтӥз. Солэн героиняез зӥбыт, улонэз яратӥсь. Актрисалы кузьмам сборникез вылэ И.Гаврилов ас киыныз гожтӥз: "Данъяськисько мон тонэныд, дуно но усто удмурт актриса!".

Со сяна, Нина Петровна радио- но телепостановкаосын вунонтэм образъёс кылдытъяз.

Нина Петровна ньыльдон арлэсь кема чебертыса возиз удмурт сценаез. Шаерамы одӥг сэрег но ӧй вал, вылды, кытын, ӧз вераллялэ тодмо артисткалы синмаськемзэс, данъяськемзэс.

<iframe width="560" height="315" src="https://www.youtube.com/embed/q5TX3TVOL6o" frameborder="0" allowfullscreen></iframe>