3-тӥ толсуре, таланто но яркыт крезьгурчилы, Удмуртиысь искусство удысысь дано ужасьлы Николай Егорович Шкляевлы тырмысалыз 100 арес.

Солэн вань улонэз герӟаськемын Удмурт театрен. Оркестрант-виолончелист, концертмейстер-баянист, театрын крезьгуръя люкетэныз кивалтӥсь Николай Шкляев ог 50-лэсь ятыр спектальёслы кырӟан гожтӥз, куинь сюзэ крезьгурен чебермаз. Соос пӧлын крезьгуро комедиос, драмаос, ӟуч классика, выжыкылъёс («Жингрес сӥзьыл», «Насьток но Исьток», «Кезьыт ошмес», «Лысву сямен уг тӧлӟы синкыли», «Катерина Измайлова», «На бойком месте», «Царевна-лягушка» но мукет).

Юбилеезлы сӥзьыса Йӧскалык тетарлэн сцена вылаз «Ой, чебер нылъёс» комедия возьматэмын вал, кытын выльысь чузъяськизы чебер, шуныт, сюлэмез вырӟытӥсь Николай Егоровичен гожтэм гуръёс.

Спектакль бере театрась ужасьёс но артистъёс пумиськизы Николай Шкляевлэн семьяеныз – Елена Николаевна нылыныз но Мария нунокеныз (внучкаеныз). Ӝыт куспын тодазы вайылӥзы тунсыко учыръёсты, быдэсъязы соин гожтэм кырӟанъёсты. Николай Егорович малпаназы кылемын аслаз ужезлы сюлмаськись, туж шуныт но лякыт адямиен. Елена Николаевналэн верамезъя, со ӧз ик малпа пумиськонзы таӵе шуныт но мылкыдо ортчоз шуыса.

Таиз ӝыт но возьматӥз, тодэ ваёнъёс – со архивлэн шыпытэз яке вунэтэм арбериосын куштӥськем шыкыз ӧвӧл шуыса. Со - улэпкын вераськон, серекъян, шумпотон, бӧрдон… Николай Егоровичез тазьы ик буре вайизы ке - ярытаса, огшоры, шуныт кылъёсын – солэн крезьгурез пыраклы калыклэн сюлэмаз но визяз кылёз.