Ортчем арняе театрлэн ужъёсыз тунсыко, бугырес, пӧзись пурты кадь вал. «Сардан» комедия премьераез сяна, маин меда со учкисьёсмылэн тодазы кылиз.

Нырысь ик, творческой пумиськонэн. Театрысь артистъёс Вероника Садаева, Петр Романов но Раиса Нефедова пумиськизы театрез яратӥсь клублэн ёзчиосыныз. Озьы ик, Йӧскалык театрын ортчиз театральной капустник, кытын артистъёс возьматӥзы пӧртэм серемес сценкаос. Номерен сцена вылэ потӥз Удмурт театр но. Капустникын артистъёс пусйемын вал пӧртэм номинациосын, кузьымъёсын. Вадим Дмитриев вормисе потӥз «Надежда» номинациын «Алые паруса» мюзиклын Меннерслэсь рользэ шудэмез понна, нош Анастасия Шубина утӥз нимаз дасям кузьым (спецприз). Ужрадэз нуизы театрысь артистъёс Иван Плотников но Марина Самсонова. Со сяна, нырысьсэ ортчытэмын театральной шудон (квест). Вормисе потӥзы асьме учкисьёсмы! Ӟечокъёс! Нимысьтыз тау кылъёс вераськом Набержной Челны карысь «Экспромт» театральной студие ветлӥсь пиналъёсылы. Тау пыриськемдылы но юрттэмдылы!