Василий Гавриловлэн 110 ар тырмонэзлы сӥзьыса, туннэ 30 коньывуонэ Йӧскалык театр возьматоз «Яратон уг пересьмы»(12+) крезьгуро комедизэ. Премьераез вал 24 шуркынмонэ 2022 арын.

Ачиз актёр но драматург сярысь. Гаврилов Василий Гаврилович, сиё-дано артист УАССР, вордӥськиз 30-тӥ коньывуонэ 1914 арын Можга ёросысь Бадӟым Сибы гуртын. 1933-1981-тӥ аръёсы ужаз Удмурт драмтеатрын. 100 ятыр паймымон рольёс шудӥз классической репертуарысь, туала ӟуч но удмурт драматургъёслэн пьессаосазы: Сатин («На дне»), Степан («Женитьба»), Туганай («Кезьыт ошмес»), Глоба («Русские люди»), Демьян Буров («Улэм потэ») но мукетъёсыз.

Василий Гаврилов гожъяськон талантсэ но возьматӥз – со гожтӥз нылпиослы произведениос, соос пӧлы пыре пьеса «Яратон уг пересьмы» (ӵош гожтэмын режиссерен но актёрен - Леонид Романовен). Василий Гаврилович улонысь кошкиз 18 коньывуонэ 1993 арын – спектакльлэн премьераозяз кык арня улыса ӧз вутты.

Спектакль сярысь.

Театрлэн историяз туннэ спектакль – кыкетӥ постановка ини. Нырысетӥезлэн режиссерез вал Леонид Романов, премьераез ортчиз 1993 арын но мынӥз театрлэн сцена вылаз 19 ар. Кыкетӥ постановка нырысетӥезлэсь пӧртэм луэ – со туала шӧмо, трос кырӟанъёсыз, эктонъёсыз, динамикаез. Режиссёрез – Константин Ложкин возьматыны тыршиз туала улонлэсь ӝог луэмзэ. Син шоры йӧто Ольга Моториналэн тыршемез (яркыт костюмъёс, сцена вылтус но пӧртэм буёло тылъёс). Спектакльлэн туала шӧмыз ке но вань, пуктӥсь группа тодаз возиз Гавриловлэн гожтэм спектаклез яратон сярысь. Угось яратон уг учкы арлыд, дыр но интывыл шоры.

Туннэ спектакльын шудо Александр Баймурзин, Екатерина Яковлева, Оксана Гаврилова, Роман Болтачев, Алексей Котков, Марина Самсонова но мукетъёсыз.

Спектакль мынэ удмурт кылын ӟуч кылэ синхрон амалэн берыктыса.