4-тӥ пӧсьтолэзе тодмо драматурглэн но прозаиклэн Егор Егорович Загребинлэн вордӥськемез дырысен 80 арес тырмысал.

Вордскиз Якшур-Бодья ёросысь Кутоншур гуртын. 1961-тӥ аре Ленинградысь Островский нимо театральной институтэз йылпумъяса, Удмурт драмтеатрын артист луыса ужаз, отын ик литературая ёзэтэн кивалтӥз, собере Удмурт телевидениын режиссёр вал, бӧрысь «Инвожо» журналлэн валтӥсь редакторез луыса ужаз.1999-тӥ арысен Удмуртиысь Писательёслэн огазеяськоныз кивалтӥз.

Егор Загребин удмурт драматургие сюрес лёгиз «Тулыс зор» драмаеныз. Со бӧрсьы кылдӥзы: «Тӧдьы юсь», «Мынам яратонэ татын», «Насьток но Исьток», «Эн кушты монэ, туганэ», «Эш-Терек», «Кикы нош силе но силе» но мукет пьесаосыз. Соос кема аръёс ӵоже мынӥзы Удмурт театрлэн сцена вылаз. Тросаз та произведениосын действие гуртын радъяське яке гуртын вордскем но будэм геройёс возьматэмын. Сямъёссыя, улон шоры учкемзыя, вераськон манерзыя соос лыдӟисез удмурт гуртъёсын улӥсьёс доры вутто. Соос пӧртэмесь: ужасесь но азьтэмесь, егитэсь но пересесь, лякыт но чурыт сямоесь. Нош конфликт пӧртэм.

1998-тӥ арын Загребинлы Россия Федерациысь лулчеберет удысысь сӥё-дано ужась ним сётэмын, 2001-тӥ арын Удмурт Элькунысь Кун премиеныз пусъемын, 2004-тӥ арын солы «Удмурт Элькунысь калык писатель» дано ним но 2008-тӥ арын Эшъяськон орден сётэмын.