26-28 куарусёнэ Ижкарысь удмурт театрлэн сцена вылаз нырысьсэ Алтай Элькунысь драмая Павел Купчияк нимо йӧскалык театр шудоз. 26-тӥ куарусёнэ Удмуртиын улӥсьёс «Чейнеш» (12+) спектаклен тодматскыны быгатозы. Возьматон алтай кылын ӟуч кылэ синхрон амалэ берыктыса мынэ. Ӟуч кылын «Ханума» (12+) крезьгуро комедиез 27-тӥ куарусёнэ возьматозы. Озьы ик Алтайысь артистъёс пиналъёслы ужзэс ваёзы – 28-тӥ куарусёнэ «Шёлковая кисточка» (6+) выжыкылэз пуктозы.

Со сяна, 28-тӥ куарусёнэ ик быдэс дуннелы тодмо усточиос-мадиськисьёс, крезьгурасьёс Болот Байрышев, Вадим Деев но Айдар Унатов «Легенды Горного Алтая» концерт возьматозы. Ватсалом, 12-14 куарусёнэ Алтай Элькунэ Удмуртиысь йӧскалык театр вуылӥз. Горно-Алтайскысь учкисьёслы «Чупчи крезь» (12+) драма, «Алые паруса» (14+) мюзикл но «Морозко» (3+) выжыкыл возьматӥзы.

Гастрольёсы 40-лэсь трос адями ветлӥз: артистъёс сяна, цехъёсын ужасьёс, театрысь ӧнерчиос. Алтайын куноосты но спектакльёсты туж шуныт пумитазы. Учкисьёс геройёсын ӵош серекъязы, куректӥзы, кичабонъёсын возьматонъёсты дугдытъязы но.

Вошъяськон гастрольёс Россиысь лулчеберетъя министерстволэн Гастрольёслы юрттэт сётонъя федерал центезрлэн «Большие гастроли. Межрегиональная программа» огъяросси программа улсын радъясько.

- Гастрольёс труппалы но выль учкисьёслы кынарен люкиськыны луонлык сёто. Со программае пыриськон, нош ми отчы куинетӥ арзэ пыриськиськомы ни, оскон сётэ, ми Россиысь пӧртэм улосвылъёсын йӧскалык театрез вылӥ возьматыны но пӧртэм репертуарен потаны быгатӥськомы шуыса, - пусйиз Удмуртиысь йӧскалык театрлэн кивалтӥсез Андрей Ураськин.