26 куарусенэ Удмурт йӧскалык театрын Ижкарысь но Ханты-Мансийскысь театръёслэн вошъяськон гастрольёссылы сӥзем пресс-конференци ортчиз. Та гастрольёс радъямын Россиысь Лулчеберетъя Министерстволэн огъяросси гастроль-концерт планэзъя ФГБУК РОСКОНЦЕРТ «Большие гастроли» программая.

Пресс-конференцие Пыриськизы йӧскалык театрлэн кивалтӥсез Сергей Чирков, обско – угор калыкъёслэн «Солнце» театрзылэн кивалтӥсез - Евгений Захаров, Удмурт театрысь актриса Елена Сунцова, Ханты-Манси театрысь актёръёс Татьяна Фоминых но Вадим Важенин, валтӥсь администратор Максим Фоминых.

Пресс-конференциез усьтӥз кутӥсь театрлэн кивалтӥсез Сергей Чирков, удмурт театр федерал программае 2017-тӥ арысен пыриське шуыса пусйиз: «Трос городъёсы но республикаосы вуылӥмы ни. Со Карелия, Алтай, Коми, Оренбург, Тыва, Марий Эл но мукетъёсыз. Туэ Ханты-Манси театрен вошъяськыны малпазы. Нош ми шумпотӥськом, куинетӥ ползэ оскалтыса но, милемлы удалтӥз».

Котыр ласянь пусйизы вошъяськон гастрольёслэсь кулэлыксэс, театръёсын кылдэм ужпумъёсты сэрттӥзы-пертчизы, вормонъёссы сярысь веразы но малпанъёссэс шараязы.

Пресс-конференциын малпанъёсын вошъяськон «Солнце» театрлэсь гастрольёссэ усьтыны кутскон интылы пӧрмиз, нош та нуналэ ик ӝыт гастрольёсты нимлыко усьтӥзы. Ӟечкылан но тау карон кылъёс веразы УР-ысь Лулчеберетъя министр Владимир Соловьёв, Удмурт театрлэн кивалтӥсез Сергей Чирков, обско – угор калыкъёслэн театрзылэн кивалтӥсез Евгений Захаров но «Солнце» театрлэн нырысетӥ чеберлыкъя кивалтӥсез Ольга Александрова.

Сцена вылын быгатыса ортчиз «Солнце» театрлэн нырысетӥ спектаклез – выль шӧмо А. Островскийлэн «Гроза» лыдӟемез.

Гастрольёслэн репертуаразы эшшо кык спектакль - Е.Айпинлэн «Великая» пластической спектаклез но «Дарт Торума» нылпи крезьгуро спектакль (авторез но режиссёрез Н.Романова).

"Гастрольёслы спектакльёсты ми озьы бырйылӥмы, котькуд учкись спектакльёсмес учконлэсь шумпотон мед басьтоз шуыса. Спектакльёсамы - со сям-йылол, выльдӥськон но эксперимент», - гастрольёсы афишаезлы валэктӥз «Солнце» театрлэн кивалтӥсез Евгений Захаров.

Куарусён толэзе Удмурт театр Ханты-Мансийскын гастрольёссэ йылпумъяз, труппалэн творчествоя диапазонэзлэсь паськыт луэмзэ возьматӥсь куинь пӧртэм спектакльёс адзытӥз: «А зори здесь тихие» спектакль-исповедь, «Ой, чебер нылъёс» («Девицы-красавицы») крезьгуро комедия но «Суперзаяц» выжыкыл.

Пусъём, Удмурт театрын спектакльёс бадӟым сцена вылын мыно, нош «Солнце» театрлэн сцена вылаз постановкаос нырысьсэ камерной условиосын возьматэмын вал. Татын артистъёс учкисьёслы туж матэ луыса шудӥзы. Со артистъёслы но театрын ужасьёслы выль опыт, выль мылкыд поттӥз.