Удмурт кыллэн калыккуспо нуналэзлы сӥзьыса, вань мылкыд карисьёслы дунтэк экскурсия но «Васьлей» спектакльлэсь усьтэм репетицизэ радъяз Удмурт театр.
«Васьлей» постановкалэн премьераез луоз ни вуоно арняе. Таӵе «йыртэмась» мылкыдо спектакль Удмурт театрлэн сцена вылаз ӧй вал на.
Усьтэм репетицие вуиз «Васьлей» пьесалэн авторез Сергей Антонов но. Театрлэн пичи сцена вылаз солэсь «Пуны» моноспектакльзэ возьматӥзы ни. Табере авторлэн выль ужез кисьмаз. Ачиз драматург но нырысьсэ репетицие лыктӥз.
— Валтӥсь режиссёрлы Алексей Ложкинлы пьесаме возьматӥ но — ужалом, шуиз. Егит актёръёслы «Васьлей» соку ик кельшиз, нош арлыдо артистъёс пӧлын пӧртэм мылкыдъёс кылдӥзы. Пьесаме мон, бызьыны вуэм нылэз сямен, режиссёрлы кышнолы сётӥ, трос тупатъяллям-а, кылъёссэ вошъяллям-а шуыса, куалекъяса уг улӥськы, — шуэ Сергей Антонов.
«Васьлей» — кык ёзэн комедия. Айы коӵышез — Васьлеез — гуртысь городэ вуттӥзы. Кузёез Нина Фёдоровна больницае эмъяськыны выдӥз, табере Васьлей солэн Ваня пиез дорын улэ. Сцена вылын туж ӧжыт декорациос: городысь пичи патер, укно, ӧс, ӝӧк, пукон но диван. Васьлей ассэ кытчы карыны уг тоды, Ваняен соос уг тупало…
Васьлейлэсь рользэ быдэстэ егит актёр Константин Никитин. Режиссёр Алексей Ложкин артистлы одӥг секундлы но ганяк кариськыны уг сёты.
— Тон коӵыш! Мар слон кадь лёгаськиськод? — тышкаське режиссёр.
Учкисьёс салкым залын курткаоссэс но ӧз куштэ. Нош Костя Никитинлэн котмем дӥсез тыбыраз лякиськиз ни, ымнырысьтыз нюлам вузэ ӵушылыны дырыз но ӧвӧл. Артист капчиен тэтчыса я ӝӧк вылэ тубе, я диван вылын погылляське.
Котькуд мизансценаез актёръёс выльысь но выльысь шудо. Режиссёрлэсь куронзэ быдэсто.
Александр Баймурзинлэн гинэ ролез — со коркакузёез шудэ — вӧй вылтӥ кадь мынэ. Режиссёрлэсь куронзэ со синмысьтыз ик адӟе, лэся. Собере, опытэз но бадӟым — Александр Баймурзин комедиосты шудыны быгатэ.
Пьесалэн авторезлы Сергей Антоновлы репетиция кельше — пальпотыса учке.
Учкисьёс понна мукетыз тунсыко ужрад ортчиз театрлэн катанчиез сьӧрын. Экскурсие вуэмъёс пӧлын огез но удмуртъёс ӧй вал. Озьы ке но соос туж ярато удмурт культураез, тунсыкъясько удмурт кылын. Театрысь литературая ёзэн кивалтӥсь Наталия Панфилова соосты вуттӥз костюм вурон, реквизит, парик лэсьтон цехъёсы. Катанчи сьӧрын сылыса, куноос учкизы, кызьы артистъёс сцена вылын ужало.
— Ми туннэ театрлэн шорсюлмаз вуылӥм кадь, ас синмынымы адӟим, кызьы вордске спектакль. Табере уката бадӟым мылкыд вань та комедие лыктыны, — мылкыдзэ вераз Нина Мусагитова.
Елена Скворцова
Ноябрь 30, 2018
газ.«Удмуурт дунне»
