Александр Вампилов ӟуч драматурглэн пьесаосыз удмурт учкисьёслы тодмо.
«Прошлым летом в Чулимске» пьесазэ 1976-тӥ арын пуктӥз вал режиссёр Василий Перевощиков. Нош 2009-тӥ арын та спектаклез «Нюлэс кушын лемлет сяська» нимын учкисьёс доры вуттӥз режиссёр Леонид Романов.
Таяз радэ Александр Вампиловлэн кык люкетэн «Провинциальные анекдоты» пьесаезъя, удмурт кылэ берыктыса, «Маскара учыръёс» спектакль пуктэмын.
«Метранпажен учыр» люкетаз гостиницалэн администраторез Калошин (шудэ К. Галиханов) номерысь донгаса поттэ Потаповез. Собере шӧдтэк шорысь тодэ: Потапов — Москваысь вуэм метранпаж. Калошин, «метранпаж» кылэз валатэк, сое бадӟым кивалтӥсь кожа. Кышкаменыз сэрен оломар но дауртэ: куалекъя, бызьылэ, янгыше усемзэ кызьы ке но быдтыны турттэ. Озьы выронъяз визьтэммон калэ вуэ. Шуге-леке шедем мурт доры ӧтё Рукосуев врачез, Калошинлэсь эшсэ. Соиз тодмозэ буйгатыны выре, сокем эн шугъяськы, шуэ. Калошинлэн урод мылкыдыз соку гинэ быре, куке со тодэ: метранпаж — со типографиысь наборщик.
Пыдтышкозяз кышкам Калошин эмъясь эшез азьын исповедь басьтыны шӧта: мон, пе, та улонын чылкыт ӧй улы. Кӧня ке дырлы солэн пушказ адямилыкез кылдэ. Улонысь кошкисько ни шуыса, озьы ик со прощение куре егит кышноезлэсь — Мариналэсь. Солы егит кузпалэн улыны шуд сӥзе, квартираме тӥледлы кельтӥсько, шуэ. Но татын шараяське: Олег нимо егит пияш чик но кузпалъяськон сярысь уг малпа вылэм. Озьы Марина но сайка: Калошинлэсь прощение куре.
Администратор Калошин тодэ вайытэ Н. Гогольлэсь Городничийзэ яке А. Чеховлэсь Хамелеонзэ. Соос сямен ик, Калошин сямзэ вошъяны быгатэ. Нырысь ик со йӧно воргорон, собере ассэ ыштэм муртлы кельше, исповедь куре. Спектакль пумын буйгатске но выль сямен улыны малпа. Но К. Галиханов артист валамон возьматӥз: Калошинлэн лулпушкыз ӧз воштӥськы.
Ӟеч мылкыд сётэ О. Гаврилова, со шудэ Калошинлэсь кузпалзэ Маринаез. Тусбуйын чебер, чылкыт егит нылкышно шудыны быгатӥз алдаськись муртэ. Аслаз небыт сямыныз котьку ик учкисез паймытэ С. Ложкина. Со шудэ Викториез. Таиз героиня ваньмызлы юрттыны дась луэ. Но С. Ложкиналы дэмламе потэ: таяз радэ сыӵе-сыӵе чигиськыса, бӧрдон куараен шудоно ӧвӧл. Шумпоттэ М. Васильев артист. Со быгатыса шудэ Олег пияшез, физкультуралы дышетӥсез. Ролез бадӟым ик ӧвӧл, но М. Васильев возьматыны быгатӥз капчи улон утчась муртэ. Улон шоры сазь синмын учке Рукосуев (В. Мадзеков).
Футболэн «висись» муртэ Потаповез шудӥз В. Краснопёров. Со ик вань метранпаж. Но со ачиз но валаса ӧз вутты, со бордысь бугыръяськон потӥз шуыса. Со быдэсак аслаз ужаз выемын: матч сярысь репортаж кылзэ. Автор та геройзэ востэм тусын-буйын возьматыны тырше. Спектакльын но со сыӵеен адӟиське. Но В. Краснопёров мултэс керӟегъяське, потӥз мыным, токма шорысь сопалась тапала донгаське. Таӵе дыртӥд-вуттӥд вырон выже мукет артистъёс вылэ но. Пьесалэн мур философской малпанэз сцена кузя бызьылон сьӧры ыше.
«Кылчинэн учыр» люкетын командировкае вуэм шофёр Анчугин (С. Пислегов) но экспедитор Угаров (А. Ложкин) номеразы секыт макмырен сайкало. Тазалыксэс «эмъяны» соослэн копейка но уксёзы кыльымтэ ни. Пунэманы нокинлэсь но нокытысь. Шӧдтэк шорысь соослэн номеразы Хомутов агроном (А. Баймурзин) шеде. Со ик макмырен курадӟись воргоронъёслы уксёзэ ӵектэ. Но шуге-леке шедем геройёс нокызьы оскыны уг быгато, доразы «кылчин» вуиз шуыса. Хомутовез соос жулик кожаса керттыло.
С. Пислегов но А. Ложкин артистъёс быгатыса, зэмос улонын сямен, шудо юыны яратӥсь муртъёсты. Анчугинлэн но Угаровлэн йыразы но, сюлмазы но уг пыры, дунне вылын умоез вань шуыса. Гостиницаысь асьсэ кадь ик эшъёс шедьто. Скрипач Базельский (П. Романов), крезьгур пушкы выем мурт, уг вала, адямилыко чылкытлык вань шуыса. Учкись адӟе тӧдьы перчаткиоссэ, фраксэ, скрипказэ. Но шӧдӥське: крезьгурез яратэмез солэсь лул-пушсэ уг вырӟыты. П. Романов скрипачлэсь образзэ оскымон шудэ.
«Маскара учыръёс» спектакльын шӧдӥськиз актёръёслэн ог-огзэс валаса шудэмзы, пьесалэсь пуштроссэ шӧдэмзы.
А. Вампилов драматурглэн возьматэм сюрестӥз мыныса, режиссёр Ю. Ерошкин усьтӥз туала вакытысь лэчыт ужпумез: асьмеос оскемысь дугдӥськом адямилэн чеберезлы. Геройёслэсь сэмберъяськемзэс учкыса, серем потэ. Но пумен со серекъян вуттэ сюлэмшугъяськонэ, бӧрдонэ.
Егит режиссёрлы но спектакльын шудэм артистъёслы творческой улоназы бадӟымесь вормонъёс сӥзем потэ. Спектакль кема мед улоз.
Анна Евсеева
Удмурт Дунне Апрель 5, 2013