28-тӥ но 29-тӥ куарусёнэ Удмурт театр возьматэ выль спектакльзэ — А. Гринъя пуктэм «Алые паруса» мюзикл. Вань билетъёс вузамын. Калыклэн мылкыдыз бугырскемын: таӵеез Удмурт театрын ӧй вал на, пе.
Бен, тодэ лыкто пӧртэм крезьгуро комедиос — «Зарни сӥзьыл» (Игнатий Гаврилов), «Насток но Исьток» (Егор Загребин) — но кырӟанъёс вылын гинэ пуктэм спектакль Удмурт театрлэн сцена вылаз шудӥське нырысьсэ.
Мюзиклын чузъяське М. Дунаевскийлэн крезьгурез, либреттозэ гожтӥзы М. Бартенев но А. Усачёв. Та творческой командаен кылдытэм уж нырысьсэ пуктэмын вал 2010-тӥ арын Москваысь егитъёслэн театразы (режиссёрез Алексей Бородин), собере выль сямен — 2013-тӥ арын — со чузъяськиз Москваысь мюзикллэн театраз (режисёрез Дмитрий Белов). «Алые паруса» кылдэм бере критикъёс веразы: табере со Россиысь тросаз театръёсы кошкоз. Озьы ик луиз, туэ вуиз удмуртаз но. Сое пуктон борды басьтӥськиз режиссёр А. Ложкин.
Маиз шумпоттэ? Спектакль зэм но Удмурт театр понна выль шӧмо. Кызьы верало шоро-куспо арлыдъем учкисьёс, та мюзикл — со «удмурт дэремлэсь» куштӥськон. Спектаклез пуктон понна театр грант утӥз бере — сое сётӥз Россиысь Культурая министерстволэн «Россиысь культура» федерал программаез — уж борды тодӥсь-валась специалистъёсты кыскыны луиз. Кылсярысь, выль костюмъёс вуремын дизайнерлэн О. Ажгихинлэн эскизъёсызъя. Нош декорациос пӧрмытэмын архитекторен К. Галихановен. Артистъёсты кырӟаны но, эктыны но нимысьтыз адямиос дышетӥзы. Ваньмыз та шӧдӥськиз спектакльлэн ӟечлыкез вылын. Артистъёслэн куараоссы пуктэмын, нош спектакльын адямиос гинэ уг, сценалэн вань сэрегъёсыз, декорациосыз шудо.
«Алые паруса» шуиськод ке, син азе пуксе романтической учыр: Ассоль трос аръёс ӵоже возьма Грейлэсь вуэмзэ. Зэмзэ ке, та дуннеын ваньмыз льӧль (оскон, яратон, Ассоль) но пурысь (улонлэн кырсь палыз, Меннерслэн тавернаез, лек морякъёс). Ассоль (А. Шубина) — льӧль малпанэзлы оскись, шуг-секытъёслы сётскисьтэм нылаш, со котырын берга быдэс спектакль. Пичи дыръяз ик Меннерсэн йырин со анаезтэк кыле, атаез сое калыклэсь утьыса будэтэ. Нош 12 арес тырмыкуз, нылызлы кузьма льӧль тӧлпоосын — анаезлэн кышетэзлэсь лэсьтэм — корабль. — Атай, малы тон монэ кырын шудыны уд лэзиськы? — юа огпол Ассоль.
— Малы ке шуоно адямиос — лекесь, — шуэ солы атаез.
Озьы ке но Ассоль чылкыт пыдыныз вамыштэ кырсь дуннее, со дырысен нылэз улон эскерыны кутске. Сое гочато капчи уксёен — проституткаын ужаны ӧтё, котыр адямиос сое «шузи» шуо, серем каро, Ассоль уен-нуналэн ӧвӧлтэм яратонзэ возьма шуыса. Нылмурт огпол гинэ чигиське: атайзэ тюрьмаысь поттон понна соглаш луэ бызьыны Меннерслэн пиезлы (С. Наговицын). Ма, осконэз но, Грей вуоз шуыса, сылмыны кутске. Но сюан сӧриське — вуэ Грей (К. Никитин).
Актёръёслэсь шудэмзэс учконо ке, ӧз тырмы романтической мылкыд. Зэм, огдыре кырӟаны но шудыны секыт, дыр, соин таяз радэ тросэз тыршизы кырӟанзэс умой быдэстыны, нош геройёссылэн мылкыдъёссы сярысь вунэтылӥзы. Озьы учкисьёс ӧз шӧдэ, Ассоль понна Грей кема возьмам яратон вайиз шуыса. Нош Меннерслэн пиез шуак аслэсьтыз яратонзэ ыштӥз шуыса. Сюлме пыӵазы Лонгренлэн (И. Моисеев), баӵколэн (Г. Бекманов), Эгльлэн (В. Краснопёров), Меннерслэн кышноезлэн (Е. Сунцова) кырӟамъёссы.
Спектакль быдэсак детальёсын тырмемын. Валтӥсез соос пӧлысь — льӧль тӧлпоосын корабль. Огпол со кошке зарезе — валамон, со та ярдуръёсы вуттоз Греез. Сцена вылэ пота нылпи — со возьматэ нылпи вакытысь утиськись льӧль осконэз.
Оглом вераса, спектакль удалтӥз, вылды, дунне мюзикл вуиз Удмуртие. Малпасько, огез ке но шутэтскон нуналды «Алые паруса» возьматонлы сӥземын луыны кулэ. 12+
Мария Векшина
газ.Удмурт Дунне
Октябрь 3, 2017 г.
