Егор Загребинлэн «Мусое мынам, мусое…» пьесаезъя пуктэм спектакль Удмурт театрлэсь выль сезонзэ усьтӥз. Солэн сюжетэз азьланьтэ драматурглэсь 80-тӥ аръёсы гожтэм «Насьток но Исьток» комедизэ.
Выль крезьгуро комедиез сиквел шуыны луоз. Западысь асэстэм «сиквел» кыллэн валэктонэз таӵе: калыклы кельшем, умой вузаськем книгалэсь, фильмлэсь яке спектакльлэсь сюжетсэ табыш поттон понна азьланьтон. Мар понна пуктэмын «Мусое мынам, мусое…»? Учкисез кыскон вылысь ке шуоно, соку пьеса пӧрмем: сюжетэз капчи, пичи мизансценаослэсь сузьемын. Номыр малпаськытэк шутэтскемды, серекъяса пукемды потэ ке, комедия кельшоз. Пьесаысь геройёс кузпалъяськон агентство пыр асьсэлы пар шедьто но, комедия люкетэз таин йылпумъяське. Нош спектакль весь уг быры на: пьесалэн кыкетӥ люкетаз геройёслэсь ӵошен гурласа улэмзэс учкиськод но возьмаса пукиськод, ку ни талэн пумыз вуоз: мӧзмыт но номыре верасьтэм суредъёс. Бразильской сериалъёсты тодэ вайыто. Нош артистъёс шоры учкыса, сыӵе малпан кылдэ: оло, соос та спектакльын асьсэлэсь шудон манерзэс серекъяло, асьсэды асьсэос ик пародировать каро. Крезьгуро пьеса Удмурт театрлэсь куке но музыкально-драматической луэмзэ тодэ вайытэ.
Мар малпало мукетъёсыз спектаклез учкисьёс, тодӥмы «Вконтакте»-ысь.
Алёна Кабанова, МГУ-ысь студентка:
— Тужгес но ляб спектакль, Удмурт театрын таӵеез ӧй вал на. Пьесаез ӟечгес карыны ӧз юрттэ режиссёрлэн быгатонлыкъёсыз но, артистъёслэн талантсы но. Егор Загребинлэсь но театрлэсь данзэс утён понна умойгес луысал, тае ноку но сцена вылын ӧз пуктысалзы ке. Анекдотъёслэсь бичет, комедия но ӧвӧл со, мюзикл но ӧвӧл.
Андрей Краснов, Ижын улӥсь:
— Тау! Туж кельшиз спектакль! Эшшо но шумпотӥ быдэсак тырмем заллы — буш интыос чик но ӧй вал! Озьы ик сюлме пыризы Загуляева Валентина Александровна артисткаез вордӥськем Алнаш ёросысьтыз Усо гуртысь ӟечкыланы лыктэм нылпиос! Туж усто!

Лариса Дмитриева
газ. «Удмурт Дунне», 13 ноября 2012г.