Удмурт театр сӥзьыллы дася выль спектакль — А. Гринлэн «Алые паруса» повестезъя мюзикл. Со пуктӥське Россиысь Культурая министерстволэн «Россиысь культура» федерал программаезлы луыса.
Удмурт театр утӥз грант — быдӟалаез ог 500 сюрс манет. Соин сэрен спектакль борды зол команда люканы луиз. Костюмъёсты вуриз тордмо модельер О. Ажгихин, декорациосты лэсьтӥз архитектор К. Галиханов, артистъёсты эктыны, вераськыны, кырӟаны дышетӥзы юромо ӧтем адямиос. Уго театр сермета выль жанрез — мюзикл — кырӟанъёсын-эктонъёсын тырмытэм спектакль. Мюзикл кылдӥз 2010-ти арны. Татын чузъяське М. Дунаевскийлэн крезьгурез, либреттозэ гожтӥзы М. Бартенев но А. Усачев.
— Кин уг быгаты вал, соос но кырӟаны кутскизы, — шуэ режиссёр А. Ложкин. — Туала вакытэ ми котьмае быгатыны кулэ. Учкись пӧртэм шоуосын, сериалъёсын поромемын ни ук.
Зэм, пыр-поч ужамлэн емышез шӧдӥське — командаысь котькуд адями вань кужымзэ сётэ. Репетициын режиссёр сюлмаськыса, пӧсяса солань-талань ветлэ, крезьгурчи И. Котельников но эктонъёсты пуктӥсь П. Лебедева киынызы шонало. Артистъёс но сюлмысь шудо — уго выль амал, выль формат.
Ассольлэсь рользэ быдэстэ Н. Буранова. Сцена вылын солы пӧртэм «тылъёс» пыр ортчоно луэ: анаез кулэм бере сое кышкытлыклэсь, бадӟым улонлэсь ватыса уте атаез. Но кема меда тылобурдоез пытсэт улын возёд? Улонэ потыса, нылаш нырысьсэ вала, мар со вӧсь луон но адямиослэн урод сямзы.
— Мюзиклын — ми понна со выль жанр — шудыны, огласянь, кышкыт: бызьылоно, эктоно, со дыре ик кырӟано. Мукет ласянь, ми туж шумпотӥськом выль амалэн пуктэм спектакльын асьмемыз эскерыны, сюлэм ик кырӟа, репетициосы лыктыку, — шуэ Н. Буранова.
Нош малы Удмурт театр А. Гринлэсь повестьсэ бырйиз?
— А. Грин — асьме палъёсысь писатель, со вордскемын Вяткой губерниысь Слободской карын (али Киров улосвылысь город), — вера А. Ложкин. — Милям вераммы потэ: адями аслэсьтыз улонзэ ачиз лэсьтэ. Кызьы, кылсярысь, Ассоль. Со пумозяз оске льӧль малпанэзлы, шуг-секытъёслы уг сётскы но ворме. Спектакль пумын со пумита Греез.
Вераны кулэ, спектакль мыноз ӟуч кылын. Шумпотысалмы, удмурт кылын но кыӵе ке мюзикл гожтэмын луысал ке, крезьгурчиослы вазисько театрын ужасьёс.
Нош азьпалан театрлэн малпанъёсыз трос на.
— «Алые паруса» спектаклен валче дасяны кутскиськом А. Григорьевлэсь «Сардан» крезьгуро комедизэ. Со милям папкаямы ог 2 ар кыллиз ни. Кемалась ик ӧвӧл театрамы усьтӥськиз пичи сцена. Отын матысь дыре возьматэмын луоз С. Антоновлэн «Пуны» спектаклез. Авторез ик режиссёр но луоз, — вера Удмурт театрлэн кивалтӥсез А. Ураськин.
Озьы ик Удмурт тетарлэн сцена вылаз матысь дыре удмурт кылын пуктэмын луоз А. Чеховлэн но Н. Островскийлэн пьессаоссы. Озьыен, театрлэн репетруарез ялан выльдӥське.
Мария Векшина
«Удмурт дунне» газет
2017-тӥ ар 29-тӥ инвожо
