Государственный национальный театр Удмуртcкой Республики

  «Ӝегась зор» удмурт йӧскалык театрын: яратон, оскон но пӧртмаськон  

Удмуртиысь йӧскалык кун театр 86-тӥ сезонзэ премьераен ворса. 24-тӥ куартолэзе отын кык ёзэн мелодрама — «Ӝегась зор» спектакль возьматозы. Иворъёсъя «Удмуртия» агентстволэн корреспондентэз премьера азьын возьматонэ ветлӥз.
Одӥг фермер возёсын бадӟым шугъяськонъёс кылдэмын: кӧс но пӧсь куазь сэрен пудо сиён тырмымтэен скалъёссэс вузано луо ни. Но вылӥ кужымъёс возёслэн кузёезлэсь — Валялэсь — чиданзэ эскерыны малпаллям кадь. Пересь анаеныз но быдэ вуымтэ пиеныз улӥсь кышномурт доры коллекторъёс вуо. Собере Москвае экономистлы дышетскыны келям сузэрез сюрес вылын шудтэм учыре шеде, эшшо ке секытэн вылэм. Вылысьтыз вылаз вуись сюлмаськонъёс сэрен Валя лекъяськыны кутске, семьяез куспын керетонъёс пото. Берытскоз-а та семьяе яратон? Усёз-а кема возьмам зор? Кин юрттоз соослы секыт адӟонзэс вормыны. Пӧртмаськись шат?
«Ӝегась зор» спектакльлэн пуктӥсь режиссёрез Владимир Сафонов, пуктӥсь суредасез — Валентин Белых, крезьгурзэ дасяз Антон Васильев.
Нялтас вераса, возьматонлэн кӧня ке интыяз мукет гуръёс кӧня ке кылӥськыло. Али ум вералэ, кытын но кыӵе, учкисьёс асьсэос мед валалозы.
«Сюлэмлэсь, пушлэсь переживанизэ возьматон понна милемлы режиссёрен ӵош со крезьгур тупагес потӥз. Отын вань кыӵе ке но, кызьы шуод ай, вӧсез но, чеберез но - мыным кулэ вал сыӵе куара, собере пентатоника асьмелэн но вань, и отын шудэмын ини баянэн но балалайкаен», - валэктӥз спектакльлы крезьгурез дасясь Антон Васильев.
Валтӥсь рольёсты шудо: Капи, карттэк кылем 60 аресъем кышномурт — Вероника Садаева но Валентина Меняйло, солэн Валя нылыз — Наталья Тур но Ольга Зорина, Леля нылыз — Светлана Сергеева но Светлана Ложкина, Валялэн Антон пиез — Алексей Котков но Константин Ложкин, Наум, валантэм адями — Сергей Пислегов.
Спектаклез учкыса, одӥг ласянь, сериалъёс тодэ лыкто. Соосты толэзьлы, куд-ог дыръя аръёслы но, нуйтон вылысь сценаристъёс одӥг семья вылэ быдэс дуннеысь вань шугъяськонъёсты кушто кадь. Валамон, сцена вылын но ваньзэ бадӟыматыса, конфликтэз юромо муромытыса возьмато. Но мукет ласянь, котькудӥз нимаз со шугъяськон котькин доры вуыны быгатэ. Кызьы вераз героинялэн анаез: «Адӟон пыд улысь потэ». Кинлэн чиданэз, осконэз юнгес — со ик ворме.
Валяез шудыны секыт ӧй вал, шуэ Наталья Тур. Но кытӥ-отӥ аслэсьтыз пӧзись мылкыдо сямзэ буйгатоно луылӥз.
«Мон туж эмоциональной адями. Соин ик со выжонъёсыз… Кытын ке небыт кариськыны. Вот режиссёр весь шуиз: «Убирай, убирай эмоции». Вот соиз мыным секытгес вал. Кинлэсь ке тани поттоно, о-о, нош мынэсьтым кысоно. <…> Мон ваньмызлы умоезлы гинэ оскисько. Мон оскисько даже, со озьы луоз шуыса. Та дунне вылын, кызьы мынам пие шуиз мыным секыт дыръя, «учкы али инбаме, мае отысь адӟиськод вылӥысь?» Мон шуисько — инбам. «Ӧвӧл, шуэ со, вӧлдэтэз учкиськод, таре киосыд шоры учкы, шуэ, таре — пыдъёсыд. Ваньзэ адӟиськод-а? Адӟиськод, мар кулэ на асьмелы? Ми шудоесь». Мон соин соглаш», — вера Наталья Тур.
Театр сезонэз выль спектаклен ворсан йӧскалык театрын сяме пыремын ни. Таяз радэ басьтӥзы асьсэ актрисазылэсь ик Римма Николаевалэсь пьесазэ. Со нырысьсэ ассэ драматургез сямен возьматэ. Солэн верамезъя, пьесаез гожтон борды басьтӥськыны ачиз улон косӥз, шонергес вераса, удмурт драматургъёслэн ӧвӧлтэмзы. Нылпиослы выжыкылъёс но бадӟым классъёсын дышетскисьёслы классикаез шудэм сяна, асьме учкисьёслы тунсыко луись спектакльёс пуктыны кулэ, лыдъя Удмуртиысь дано артистка.
«Милемлы али гожъясьёс ӧвӧл. Мон документация учки но... берпуметӥ спектакль 13 арын гожтэмын вал «Намер» Анатолий Леонтьевич Григорьевен. Ми доры гожъясьёс ӧвӧл, шуом. Одӥг-кык ветло — пуктӥськом. Но со туж секыт удыс, гожъяськонысь самой секытэз, соин ик адямиос шугъясько, дыр. Мон но та калэ вуи, куке эшъёсы шуизы, «ойдо, кызьы ке, но удмурт культураез ӝутомы», со Юра Ерошкин вал. <…> Тӥни озьы кутскимы», — тодаз вае драматургия ӧре потэмзэ Римма Николаева.
Пьесаез гожтонын солы юрттӥз сцена вылын трос аръёс ӵоже шудэмез. Тодэ вал, мар кельшегес удмурт учкисьлы — со комедия но мелодрама.
«Пуштросэз яратон, оскон сярысь. Осконтэк улыны уг луы. Мынам психологиен дышетӥсе шуиз куке но: уд ке но, пе, оскиськы, номырлы, нокинлы но ке уд оскиськы — со но, пе, оскон. Нош татын тани умоезлы, ӟечезлы оскон. Конечно, ӟечгес луысал, режиссер удмуртъёс пӧлысь ке луысал. Кыӵе ке но, шуом, нюансъёсты ӟуч адями со уг вала. Кема аръёс ӵоже улэмын со татын, но кыӵе ке удмурт шӧмзэ со ыштэ шуод-а, мар-а, вань сыӵе. Но со милям самой али кема ужам, бадӟым опытэн режиссёр — Владимир Иванович Сафонов. Мынам осконэ вань, та спектакль адямиослы кельшоз шуыса», — вераз «Ӝегась зор» пьесалэн авторез.
Вераны кулэ, Римма Николаевалэн та одӥг гинэ пьесаез ӧвӧл. Театр басьтӥз ни «Пал тури» комедизэ.
«Солы тоже режиссёр кулэ, со али театрлэн папкаяз. Со крезьгуро комедия, кудъёсыз удмуртъёслы, шуом, туж кельшо — кырӟанъёсын, крезьгуръёсын, серекьянэн. Собере эшшо одӥгез вань на, «Узы вуытозь» нимаське. Но соиз ӝыныё-урдсо гинэ», — шуиз Николаева.
Инвожое йӧскалык театр нылпиослы спектакльёссэ возьматоз на. Собере гастрольёсы поталозы, шутэтскозы но выль сезонлы дасяськыны кутскозы. «Ӝегась зор» спектаклен сяна, учкисьёссэс мукет но ужъёсынызы шумпоттозы. Маке ке чылкак вылез но луоз, дыр. 16-тӥ куартолэзе театрын пичи залзэс, экспериментальной площадказэс, усьтӥзы.

Майя Бывальцева
ИА «Удмуртия»
24.05.2017