Удмуртиысь йӧскалык кун театрлэсь пичи залзэ усьтӥзы 15-тӥ куартолэзе. Со 50–60 учкисьлы чакламын.
Театрлэн кивалтӥсез Андрей Ураськин верамъя, юртсэ выльдонъя ӵектосэз дасяку ик та висъетын пичи зал луоз шуыса чакламын вал. Но со репетициос нуыны зал сямен ужаз, трос аръёс ӵоже склад интыын но вал. Табере малпанзы быдэсмиз. Пичи залазы басьтӥзы вань кулэ тӥрлык, кылиз на пандусъёс лэсьтыны.
«Та пичи залын котьмар но лэсьтыны луоз: творческой пумиськонъёс, экспериментальной спектакльёс, моноспектакльёс, мар потэ милям артистъёсмылэн, творческий коллективмылэн, сое ик мед лэсьтозы. <…> Бадӟым сцена вылын ми малпаськом ке, калык лыктоз-а, билет сярысь, дун сярысь, нош татын ми сое малпатэк быгатӥськом лэсьтыны. Калык лыктоз-а, яралоз-а — мед артистъёслы яралоз, но калыклы но бен ярамзы потоз, но мед луоз соослэн экспериментировать каремзы, со мед луоз зэмос театральной лаборатория», — вераз Андрей Ураськин.
Удмурт театр, учкисьёс понна пусйымон луись ужрадэ лыктӥз Удмуртиысь лулчеберетъя но туризмъя министр Владимир Соловьёв. Солэн верамезъя, асьмеос трос вераськиськом коньдон ӧвӧл шуыса, «но куке адями тырше, мар ке но шедьтэ».
«Мон малпасько, тӥнь та площадка туннэ сыӵе луонлык сётоз асьмелэн литературае пыриськись не только классикъёслы, удмурт классикъёслы, <…> али кутскись поэтъёслы но писательёслы, сыӵе площадка, кудаз ке соос, асьсэдыз возьматыса, калык пушкы пырыны луонлык шедьтозы. <…> Тани берло 2–3 ар куспын асьме йӧскалык театр тунсыкогес ужаны кутскиз, малы ке шуоно котькуд спектакль, кудӥз ке та сцена вылын асьме доры, учкись доры вуэ, - со бадӟым ужрадлы, событилы пӧрме. Соин ик, Андрей Иванович, кутскем ужды азьланяз но мед азинскоз», — вазиськиз лулчеберетъя но туризмъя министр.
Пичи залэз усьтӥзы премьераен — егит артист Константин Ложкин туала кылбуретэз крезьгурен но кырӟанъёсын герӟам ӝыт дасяз. Театрлэн валтӥсь режиссёрез Алексей Ложкин верамъя, «кылбур удыс — со али туж актуальной тема».
«Со сериальной темаос палэнэ кошко ни, гламурной тема палэнэ кошке, со ваньмыз акыльтӥз ни, соин ик али нош ик берытскиськомы лулпушез поттыны, пыдлось малпанъёсты поттыны, кыкетӥ планэз сётыны учкисьлы», — лыдъя Алесей Ложкин.
«Кылбурен валче вамышъяса» возьматонэ пыризы пӧртэм аръёсы, пӧртэм адямиосын гожтэм кылбуръёс. Соос пӧлын классикъёс — Даниил Яшин, Герман Ходырев, Николай Байтеряков, Татьяна Чернова, Михаил Федотов, озьы ик егитъёс — Богдан Анфиногенов, Лилия Юртаева, Любовь Васильева.
Чузъяськизы яратоно но тодмо кырӟанъёс: «Бусъёсын шобырскизы», «Ӵукна», «Мон гуртын улӥсько» но мукетъёсыз. Соосты бырйиз но баянэн шудӥз Иван Котельников.
Константин Ложкин кылбуръёсты но кырӟанъёсты сузьйылыса яркыт но чебер чыртывесь кылдытэм. Яратон, инкуазь, вордскем шаер сярысь кылбуръёсты лыдӟыса, егит артистъёс Роман Болтачев, Наталия Буранова, Мария Дмитриева, Иван Плотников, Анастасия Шубина, Константин Никитин, Удмуртиысь дано артистъёс Вячеслав Краснопёров но Елена Сунцова, Удмуртиысь калык артистка Валентина Моисеева асьсэлэсь пушдуннезэс усьтӥзы кадь. Кытӥ-отӥ гурак серектон но потылӥз, вылтыр но юзыр-кезьыр луылӥз, синвуос но вуылӥзы.
«Туж кельшиз, мыло-кыдо пуким, егит дыръёсмес тодамы вайим. Артистъёс но туж быгатыса, сюлэмзэс ик поныса шудӥзы. Синкылиоссы но потӥз кадь. <…> Артистъёс тазьы артэ ик сылыса, синъёсазы ик учкыса, туж кельшиз. Соосын ик малпаськиськод, отчы ик пыриськод кадь, со туж умой», — мылкыдзэс веразы учкисьёс.
Кӧня но макем ӵем выль ужъёс кылдытэмын луозы пичи залын, али шуг вераны. Но матысь возьматонлы пьесазы вань ни.
«Лыдӟимы алигес гинэ егит удмурт драматурглэсь пьесазэ, нимысьтыз тӥнь та пичи залмылы. Со пьесаез, мон шуысал, гожтэмын умой. Со бордын ужан но кутскиськомы ни. Со егит драматург, мунё театрысь актёр Сергей Антонов. Со луоз одӥгез удмурт пьеса. Озьы ке ми ужалом на, шуом, ... малы ми ум быгатӥське шудыны МакДонахез? Ӟуч кылын но шудом, быгатомы шудыны котькыӵе драматургез, пӧртэм-пӧртэм, котьмае», — пусйиз Удмуртиысь йӧскалык театрлэн валтӥсь режиссёрез Алексей Ложкин.
«Туж малпаме потэ, умой пьеса пӧрмоз шуыса, «Пуны» нимаське кудӥз. Милям улонмы сярысь, нимаз адямиос сярысь, сыӵе секыт югдуре сюрем пересь адями сярысь. Малпасько, со сыӵе камерной обстановкаын, даже интимной шуыны луысал, туж умой ортчоз кадь. Мынам сыӵе луонлыке ӧй вал (ассэ драматургез сямен возьматыны- ред.), туж шумпотӥсько таӵе луонлык потӥз, тау удмурт театрмылы сыӵе луонлык сётэмез понна», — вераз Удмуртиысь мунё театрысь артист, кутскись драматург Сергей Антонов.

Майя Бывальцева
ИА "Удмуртия"
16.05.2017