Государственный национальный театр Удмуртcкой Республики

  Удмурт театрысь артистка Римма Николаева «Гудырипуз» книгазэ поттӥз  

Удмуртиысь дано артисткалэн та кыкетӥ ужез ини.
Нырысетӥез, «Инмысь шуд» бичетэз но, таиз но нылпиослы чакламын, пуштросэз — сценкаос но выжыкылъёс. Республикаысьтымы искусствоосъя нылпи школаысь покчиос авторлэсь кык книгазэ ик ӟеч тодо. Римма Николаева татчы пумиськонэ ветлыку, усточиос кык сценказэ возьматӥзы: «Инмысь шуд» книгаысь «Паймымон сяртчызэ» но «Гудырипузысь» — «Кык йыр кубиста» нимаськисьсэ. Римма Николаева тау кариз покчи артистъёслы но мадиз театрын шудэмез но выжыкыл гожъямез сярысь.
— Мон пичиысен кылбуръёс гожъяны кутски, нош выжыкылъёсы кылдӥзы нылпиосы вордскем бере. Изьыны выдӥськом ке, мон пиналъёсылы выжыкыл верасько вал. Мон малпасько удмурт нылпиос одно ик анай кылынызы выжыкылъёсты лыдӟыны кулэ, соин ик басьтӥськи книга борды. Арлыд будэмъя но туж яратӥсько соосты, выжыкылъёсам ачим ик улысал, малы ке шуоно, мае уг луы воштыны улонын, туж ӝог тупатыны выжыкылын, — шуэ Римма Павловна.
Нялтас вераса, Римма Николаевалэн поттыны дась ини куинетӥ книгаез, со чакламын бадӟым нылпиослы.

Галина Савина
«Удмурт дунне»,
2016-тü ар 2-тü южтолэзь