Азинскон выль нимъёс бордын
Удмурт театрлы 7-тӥ тулыспалэ 85 ар тырме.Театр понна со трос-а, ичи-а? Кыӵе адямиос кылдыто солэсь историзэ? Театрлэн туннэ нуналэз сярысь вера кивалтüсез Андрей Ураськин.
— Андрей Иванович, И. Гавриловлэсь «Вало ӧр куашетэ» спектакльзэ пуктэм бере ортчиз 85 ар. Со дырысен пӧртэм вакытъёс ортчизы. Кыӵе бен со туннэ — яратоно Удмурт театрмы?
— 85 ар — театр понна бадӟым лыдпус. Ижысь со огез вашкалаез театр. Юбилеймылы сӥзьыса, пятницае, 5-тӥ феврале, возьматомы И. Гавриловлэсь «Жингрес сӥзьыл» пьесазэ. Юбилеямы ӧтимы яратоно эшъёсмес, азьвыл татын ужам адямиосты. Ваньзы соос трос кужымзэс, быгатонлыксэс сётӥзы театрез ӝутон, азинтон понна. 85 аресаз но театрмы ялан егит, ми вуоноеныз улӥськом. Угось театрез выльдэм-тупатъям бере солэн кыкетӥ шоканэз усьтӥськиз. Ми сое учкисьёслэн лыктэмзыя но, спектакльёсмыя но валаськом. Театрез выльдон аспӧртэмлыко кужым сётӥз.
Театр усьтӥськыку, асьмелэн ӧй вал дышетскем артистъёсмы. Туннэ нуналлы 8-тӥ поколениысь артистъёс шудо ини. Ленинградын, Москваын, Уфаын дышетскем артистъёсты калык гажа, яратэ. 2013-тӥ арын, Щепкин нимо театр училищеез йылпумъяса, дорамы вуизы егитъёс. Соосты дышетскыны ыстон вылысь студия люкамын вал 2009-тӥ арын. Азьло уката ик пиосыз, нимысьтыз утчаса, гуртъёстӥ ветло вал, нош куд-ог дыръя кыкетӥ курсэ ватсаса набор ялылӥзы. Нош таяз радэ одӥг интые 4-5 адями куриськиз. Озьыен, театрлэн кулэлыкез туж бадӟым.
Шуом, 10 ар талэсь азьло театр арскын поттэ вал 1 миллион но ӝыны манет табыш. Нош туннэ — 17 миллион манет пала. Коньдон поттыны быгатӥськом, спектакльёс шудыса, озьы ик Выль ар азьын кӧня ке концертъёс луо, собере пӧртэм огазеяськонъёс юртмес арендае курыло.
Гастрольёсы потанъёсмес но ӧм кулэстэ, тросгес ёрос центръёсы ветлӥськом. Сюресъёс али умоесь бере, отчы гуртъёсысь учкисьёс трос лыкто. Театре но котькытысь вуо — яръёс но, кизнеръёс но, кезъёс но…
Репертуармы сярысь ке верано, милям вань удмурт, туала драматургияя, ӟуч классикая пуктэм спектакльёсмы. У. Шекспирмы но вань. Репертуармылы ӟуч театръёс но вожъяськыны быгатозы. Туннэ нуналлы репертуармы туж пӧртэм но тунсыко — артистъёслы вань кытчы будыны. Котькуд ар одно ик 4-5 выль спектакль пуктӥськом. Соос пӧлын одӥгез луэ нылпиослы Выль ар выжыкыл. Али выжыкылъёсмы ӟуч кылын гинэ мыно, малы ке шуоно городын удмурт кылэз валась пиналъёс трос ӧвӧл. Но вераськонмы вань, оло, таяз арын удмурт кылын выжыкыл пуктыны быгатом. Тодӥськомы, со табыш уз вайы, Ижевскын удмурт кылэз валась нылпиос сомында ӧвӧл. Соин ик гуртъёсы потаны чакласьком. Бен, ёросъёсын но пиналъёс ӟучомо, но милемлы будэтоно вуоно учкисьёсмес: пиналъёс удмурт кылын мед вераськозы, мед валалозы анай кылзэс. Соин но троссэ нылпиосты спектакльёсы дунтэк пыртӥськомы, со ласянь «Ӟечбур!» газетэн мылысь-кыдысь ужаськомы, соосын ӵош пӧртэм ужрадъёс ортчытӥськомы.
— Выжыкылъёс покчиослы чакламын. Нош дышетскись пиналъёсты маин гочатӥськоды?
— Бадӟым классъёсысь пиналъёс понна ортчытъяськом театр искусстволы сӥзем нуналъёс. Куспамы ми сое фестиваль шуиськомы — сӥзьыл со быдэс толэзь ӵоже мынэ. Соку возьматӥськомы вань классической репертуармес. Уноез ӝожтӥсько, пиналъёслэн лыдӟиськемзы уг поты ни шуыса. Мон таин соглаш ӧвӧл: залын соос чус пуко, валаса учко. Иське, классика соослы матын потэ.
— Эшшо кыӵе выль малпанъёсты вань на?
— Планъёс трос. И. Тургеневлэн «Отцы и дети» романэзъя режиссёрлэн В. Сафоновлэн спектакль пуктыны мылкыдыз вань. Собере дуннеысь классикаез но тросгес пыртомы шуыса, оскисько. Мынам кемалась сюлмы висе ини У. Шекспирлэсь «Гамлет» трагедизэ удмурт кылын пуктон пумысен. Валамон ини, сое берыктыны, быгатыса пуктыны кулэ — учкисьлы со мед луоз тунсыко.
— Асьмеос удмурт пьесаослы котьку но шугъяськиськом. Но удмурт спектакльёс театрын мыно, выльёссэ пуктылӥськоды, куддыръя вужъёссэ но выльдӥськоды…
— Удмурт драматургиез ми туж вылӥ дунъяськом. Одӥг дэмлам пьесаез но ум палэнтӥське, сое быдэс коллективен пыр-поч лыдӟиськом, худсоветэн эскериськом. Пьесаос гожъяны капчи ӧвӧл, литератураын со одӥгез секытэз жанр. Драматург котькуд ролез адӟыны, сценалэсь куронъёссэ валаны кулэ. Пьеса гожъясьёс чылкак ӧвӧл шуыны уг луы, тросэзлэн мылкыдзы вань, но театрез пуш ласянь валанзы уггес тырмы. Удмурт драматургия вылӥынгес мед луоз кадь потэ. Соин ик куронъёсмы милям юнэсь. Куд-ог авторъёс йырзэс но кур каро, ми гожъяськом — тӥ уд пуктӥське, шуо. Но ми ум быгатӥське котькуд веросэз яке повестез, диалоге выжтыса, пьесаез сямен пуктыны. Вуттэ тӥ сое йылаз-пумаз, яке театре лыктыса, милемын ӵош ужалэ. Мон котьку но шуисько: вордӥськиз ке зол пьеса, ми, вань планъёсмес воштыса, басьтӥськомы сое пуктон борды. Со понна ик ялӥмы вал конкурс, вормисьёслы коньдон премиос ӵектыса. Но отчы пыриськизы тодмо авторъёс ик. Нырысетӥ интыез басьтӥз А. Григорьев «Намер» пьесаеныз, сыӵеез солэн ӧй вал ай — действиез пӧртэм вакытъёсы мынэ. Туж потэ вал выль нимъёсыз адӟем.
— Театре вуэм егитъёс капчиен-а пыризы театрлэн улоназ?
— Туж валась-быгатӥсь пиналъёс. Соос тросгес шудо выльёсаз спектакльёсамы, соин ӵукнаысен ӝытозь соос театрын, рольёссэс дышето, репетициосысь уг потало. Пӧлазы вань сценарий гожъяны быгатӥсьёс, кин ке концертъёсыз нуыны пӧрмытэ, элькун ужрадъёсы но соосыз туж ӵем ӧтьыло. Нош Константин Ложкин пиналъёслы «Бременские музыканты» выжыкыл но пуктӥз ини.
— Иське, Ложкин фамилия театр понна туж пайдаё?
— Со зэмзэ но озьы. Кузьма Ложкин — артист но режиссёр, театрез кылдытӥсьёс пӧлысь одӥгез. Алексей Ложкин — ӟеч артист, али валтӥсь режиссёрмы. Со кӧня ке спектакльёс пуктӥз ини. Берпуметӥ ужез — И. Гавриловлэн пьесаезъя «Жингрес сӥзьыл» спектакль. Туала вакытлы тупатыса, егитъёслэн синмынызы учкыса, лэсьтэмын — тунсыко пӧрмиз. Но артистъёс сяна, спектакль дасянэ трос адямиос пырисько: художественной, столярной, костюмерной, реквизиторской, бутафорской цехъёсын ужасьёс, дӥсь вурисьёс, тыл пуктӥсьёс, звукооператоръёс, режиссёръёс… Соос ваньзы одӥг малпанэн уло, спектакль учкисьлы тунсыко мед луоз шуыса, сюлмасько.
— Спектакль пуктыны кулэ на суредась но крезьгурчи. Та удысъёсын уно аръёс ӵоже ужазы Г. Векшин но Н. Шкляев. Туннэ нуналлы вань-а соосты воштӥсьёс?
— Зэм но, Георгий Ефимович но Николай Егорович театр понна трос лэсьтӥзы, ӝыны улонзэс сётӥзы, шуыны луоз. Спектакльёсты крезьгурен чеберъясьёс пумысен шугъяськонъёс уггес кылдо, со ласянь ужало А. Эркишев но А. Васильев. Тросгес сюлмаськонъёсмы художник-постановщик, режиссёр-постановщик ласянь. Тани «Жингрес сӥзьыл» спектакль бордын художник луыса туж быгатыса ужаз егит артисткамы М. Самсонова. Солэн та удысъя дышетскыны мылкыдыз но вань. Егитъёслэн нырысетӥ вамышъёссы оскыто, соослэн ваньмыз пӧрмоз шуыса.
— Озьыен, сюлмаськонъёсты туннэ понна вань?
— Соос вань, мед но луозы. Сюлмаськонъёс ке вань, улон мынэ, шуо. Но соосты вормыны мед быгатомы.
— Театрлэн данэзлэсь будэмзэ возьматэ, вылды, со но: учкисьёс пӧлын трос луизы ӟучъёс.
— Бен, удмурт кылэз валасьтэмъёс но спектакльёсмес учкыны быгато ини, залын ог куиньмос люкетэз наушникъёсын пуко.
Тросэз учкисьёс шуо: Удмурт театре пыроно доре кадь. Мон ваньзэсты ӟечкыласько огъя юбилеенымы. Ветлэ спектакльёсамы, ми тӥледыз шумпотыса возьмаськом. Театрын вань ужасьёслы тазалык, шудбур сӥзисько.

Анастасия Гребина
«Удмурт дунне» 2016-тü ар 5-тü тулыспал