Государственный национальный театр Удмуртcкой Республики

  Син кылэ, пель адӟе?  

Щепкин нимо училищеез йылпумъяса, егит артистъёс Удмурт театрлэн сцена вылаз возьматӥзы диплом спектакльёссэс. Ӟуч классиклэн Д. Фонвизинлэн «Недоросль» пьесаез но Англиысь драматурглэн У. Шекспирлэн «Сон в шалую ночь» пьесаез удмурт кылын чузъяськизы.
«Ослоп» но «Гужем уе вӧтан» – озьы нимаськизы ужъёс. Нырысетӥзэ берыктӥз Анатолий Григорьев, кыкетӥзэ – Пётр Захаров. Пьесаослэн кылзы пумысен кылдэм кӧня ке малпанъёсме шараяме потӥз. Ужед нуналысь нуналэ гожъяськонэн герӟаськемын бере, шакырес интыос соку ик пеле йӧто.
«Ослоп» комедиез учкыса, егит артистъёс жаль потӥзы. Фонвизинлэсь кылзэ берыктыны капчи ӧвӧл, дыр. Но спектакль ӵоже вылысьтыз вылаз пӧртэм оборотъёсын предложениос чузъясько ке, артистъёслэсь верано кылъёссэс волятэм потыны кутске. Спектакле удмурт шӧм пыртэмын бере, малы уг луы пьесаез калыклэн вераськон манерезлы матэ карыны?
Мон сямен, берыктэм уж литературной кыллэсь палэнэгес кожемын, кытӥ-отӥ подстрочник выллем чузъяське. Фонвизинлэн пӧрмостэм героезлэсь калыке вӧлмем «Не хочу учиться, а хочу жениться» лэчыт веранзэ туж огшоры каремын: «Уг пот дышетскеме, потэ кышно ваеме».
Пукиськод но малпаськод: пьеса капчи кылын гожтэмын луысал ке, артистъёс геройёссылэсь мылкыдъёссэс вӧлак усьтыны быгатысалзы, кыл борды кугӟанъёссы но ӧжытгес луысалзы. Оло, янгышасько: кугӟанъёс воксё кылтӥрлыклэн чеберлыкеныз герӟаськемын ӧвӧл, соос артистъёслэн вераськыны быгатонлыкъёссы бордысь пото – сценическая речь шуонзы чутэ. Таиз пумысен ӟечгес вералозы, дыр, специалистъёс.
Но А. Григорьевлэсь гожъяськыны быгатонлыкъёссэ тодыса, трос берыктэм ужъёссэ адӟыса, паймеменым аслыз вазиськоно кариськи. Анатолий Леонтьевич уката но абдратӥз.
- Пьесалэсь кылзэ, залын пукыса гинэ, кылӥ, – шуэ драматург. – Москвае келяме бере киям со ӧз вуылы ни. Берыктэм ужме землячествоын лыдӟиллям, туж ушъязы. Нош берло малы сое вошъяллям? Гожъямме кытӥ-отӥ ачим но ӧй тодма, пуконам мургес выён калэ но вуылӥ. Гожъяны турттӥ литературной кылын, но артистъёслэн верамъёсысьтызы дасо пала диалект кылъёс, оборотъёс пелям шуккиськизы. Пиналъёс пӧртэм ёросъёсысь вуэмын, оло, соослы валамонгес карыны турттӥзы? Дышетскон пумысен но мынам мукет сямен гожтэмын вал: «Уг пот дышетскеме, потэ кышнояськеме».
Москвае репетициосы ветлыны луонлык ӧй вал, пинал артистъёслэн театре вуэмзы бере но кыл бордын ужаны дыр ӧз шедьы. Мар вайизы Москваысь, сое ик возьматӥзы. Сӥзьыл та спектакль выльысь мыноз Удмурт театрлэн сцена вылаз. Малпасько, пьесалэсь кылзэ выльысь эскерытэк уз луы. Соку репетициосын но пукысал ни.
«Гужем уе вӧтан» кылбураса гожтэмын. Геройёслэсь кылъёссэс одӥг-ог валаны выриськод ик: мар ай татын вераны турттэм берыктӥсь? Кык-куинь кылъёсысь ударениос но интыоссэс воштӥллям. Нош оглом верано ке, таиз уж шулдырак кылӥське.
Шекспирлэсь та пьесазэ удмурт учкисьёс доры вуттон – егитъёс понна бадӟым но секыт уж. Соин но быгатонлыкъёссэс кык поллы будэтыны кулэ вал, дыр, уката ик нырысетӥ люкетаз, нюлэскын улӥсь эльфъёсын но феяосын суредэз возьматыкузы. Кылзыны шуг вал: оло адями кылын верасько соос, оло ас понназы мар ке бӧтьырто. Валаны турттыса, чыртыез сцена пала кузь-кузь кароно луиськиз.
Кемагес «вегнаськеменызы», лэся, ӧжыт умме ӧз уськытэ. Ярам, эксэй кышнозы потэмен, синъёс но пельёс усьтӥськизы. Отӥяз спектакльысь геройёс пумен-пумен ас дуннеязы выйтӥзы, артистъёслэн но вераськон кылзы юнмаз. Егитъёслэсь ужзэс туж тунсыко потӥз ни учкыны.
Нош оглом спектакльёс бере гуртэ ӝутскем мылкыдын бертӥ. Егитъёслэсь, озьы ик театрысь мукет артистъёслэсь выль ужъёссэс учкем потэ… сюлмын, визьмын. Соос медаз пӧрме вылэм «син кылэ, пель адӟе» шуэмлы.

Лия Малых
газ. «Удмурт дунне», 5 Пӧсьтолэзь 2013