Государственный национальный театр Удмуртcкой Республики

  Удмурт вакханкаос шулдыръясько  

23-тӥ куартолэзе Удмурт театрын «Ой, чебер нылъёс» спектакльлэн премьераез ортчиз. Удмурт классиклэн Степан Широбоковлэн комедиезъя та 3-тӥез постановка ини.

Пьеса нырысетӥзэ сцена вылын улӟиз 1969-тӥ арын, кыкетӥзэ сое дасязы 1999-тӥ арын. Учкисьёс та комедиез яратӥзы — сцена вылын 13 ар ӵоже мынӥз. Соин но выль постановкаез дасясьёслэн ужзы капчи ӧй вал. Учкисьлы выльзэ спектаклез вуженыз ӵошатытэк ӧйлась.

Спектаклез пуктыны оскизы егит артистлы Константин Ложкинлы — со режиссёр-постановщиклэсь ужзэ быдэстӥз, нош артистка Марина Самсонова — художник-постановщиклэсь ужзэ. Егитъёс крезьгуро комедиез ӵошен выльдыны тыршизы.

Действие ортче Епифановналэн садаз. Татын куакъёс ӵышкемын, чебермамын, колонка интыын — фонтан: кышномурт ландшафтной дизайнэн тунсыкъяське, вылды. Ма, али тросэз гуртоос бакчаоссэс, картошкалы пичи сэрег гинэ висъяса, олокызьы но чебермало, куакъёслэсь «улэп кенеръёс» лэсьто. Нош Епифановна понна вылтус — валтӥсез, солы кен но самой чеберез но узырез кулэ. Соин Епифановна пиезлы — нылашъёсты яратӥсь егит Гирой агрономлы — кышно вайыны ӵектэ Соняез, гуртысь егит бухгалтерез. Удмурт казанова соглаш кариське — вань нылъёсты «веръяса» сёравно уд вутты (туж потэ ке но вылэм!). Садэз эшшо но чебергес каро, сюанлы дасясько. Со вакытэ гуртэ вуэ Тоня инженер — чебер, шаплы нылмурт. Гиройлэн йырыз берытске.

Ваньзылы тодмо сюжет уг воштӥськы — егитъёс озьы ик синмасько, лулӟыло, кырӟало, серекъяло. Но ваньзэ «укыр» каро, Бразилиысь сериалъёсын кадь. Действие ялан чуртнасько гуртысь чебер нылъёс — соос уллёен ветло, юр-яр каро, геройёслы я юртто, я люкето. Соос шоры учкыса, тодэ лыктэ вакханкаослэн шулдыръяськемзы. Вашкала грекъёс, Дионис инмарзылы (со будосъёслэн, виналэн, инкуазьлэн ваньзэ улӟытӥсь кужымезлэн инмарзы вал) сӥзьыса, юмшанъёс — дионисийёс — ортчытъяло вал. «Ой, чебер нылъёс» ӵапак со вакханалиослы тупа. Удмурт вакханкаос бордын сатирзы но вань — Митрей агай. Со понна но улон — шулдыръяськон-шаянтон.

Ма, спектакльын егит дыр быдэсак кузёяське — арлыдоос но экто-кырӟало, исасько, егитъёслэсь бере уг кылё. «Шаян» кыл быдэс постановкалы тупа кадь. Режиссёр шаянтыса Тоняез гироскутер вылэ пуктэ. Художник-постановщик шаянтыса нылъёс вылэ «чебер нылъёс» гожтэмен футболкаос дӥся, геройёслы мултэс яркыт костюмъёс дася. Яркыт буёлъёслэсь, геройёслэн ялан отчы-татчы ветлэмзылэсь, тэтчамзылэсь, эктэмзылэсь син мальдэ. Артистъёс кызьы гинэ уг маскаръясько учкисез серекъятон понна. Нош эшшо ваньзы сямен кырӟало. Кырӟанъёс татын маке мында, но театрысь потэм бере йырын чузъяське, конешно, «сопала но тапала — чудо-юдо камбала…»

Бӧрысь спектакль сцена вылэ но тэремысь дугдэ — уртчыса со учкисьёс доры потэ. Азьло сюанъёс дыръя коркась корка юмшаса ветло вал, спектакльын но сюан вань калыкез кыске. Спектакльысь сюан тодам вайытӥз Екатеринбургысь «Коляда-Театрын» учкем «Скрипка, бубен и утюг» спектаклез. Отын ӟуч юмшан фарс пыр возьматэмын. «Ой, чебер нылъёс» спектаклез но фарсэз кадь учконо. Со сыӵе гольтырес утопия, кырыж синучкон: та дуннеын егит специалистъёс гуртэ ужаны мыно, нош ужпумъёс пӧлысь самой висьытӥсез — яратон. 2 метръем чипейёсты но та дуннеын огшоры визнанэн кутыны луэ. Кызьы меда со дуннее сюроно? Жаляса верано, отчы 2 часлы гинэ вуылыны луэ, Удмурт театре мыныса. Со понна но кӧня ке толэзь возьманы кулэ на — спектаклез выль сезонын гинэ возьматозы на табере.

Анастасия Шумилова
Май 24, 2019
газ.«Удмурт дунне»