Государственный национальный театр Удмуртcкой Республики

  Постижёр но бутафор…  

Театрысь спектакле вуыса, учкись серекъя яке бӧрдэ, куректэ яке шумпотэ. Адямилы мылкыд сётон понна сцена вылын «уло» актёръёс. Соос спектакльлэн ымнырыз, сямыз, сюлмыз. Но спектакль мед пӧрмоз шуыса, театрын тыршо трос мукет профессиосын адямиос. Кинъёс соос? Ӧтиськом тӥледыз Удмурт театрлэн катанчи сьӧраз кожаны.

Котькудӥзлы — нимаз дӥсь

Удмурт театрын син шорын 43 артистъёс. Нош солэсь тросгес адями — 130 мында — катанчи сьӧрын. Сцена вылысь асьмеос ноку ум адӟе югдытӥсьёсты но звукорежиссёръёсты, бутафоръёсты но костюмеръёсты, постижёръёсты но вуриськисьёсты. Ма соос каро, тодэ театрысь литературая ёзэн кивалтӥсь Наталия Панфилова. Со доры экскурсие вуыло школаын дышетскисьёс но, пенсионеръёс но, ужась калык но.

Выль спектакльлы дасяськыны висъяське ог 3 толэзь. Артистъёс кутско ужаны репетициосъя залын, сцена вылын, нош со вакытэ ик уж пӧзе ни цехъёсын. Кылсярысь, костюм вурон цехе вуо художник-постановщиклэн эскизъёсыз. Театр пӧртэм суредасьёсын ужа, элькунысь гинэ ӧвӧл, палэнысь но ӧтьылэ. Кылсярысь, «Алые паруса» мюзикллы дӥсь малпаз Удмуртиысь тодмо модельер Олег Ажгихин. «Чупчи крезь» калык эпослы — калык суредась Валентин Белых. Берло ортчем «Мёртвые души» спектакльлы костюмъёс суредаз Санкт-Петербургысь Игорь Шаймарданов, нош «Вожояськон» постановкалы — Москваысь Василиса Кутузова.

Котькуд суред бордын юнматэмын басма юдэс. Со ивортэ, марлэсь чакламын вурыны тазэ яке созэ костюмез. Суредась шуиз ке, полиэтиленлэсь костюм кылдытоно, озьыен, вуриськисьёс солэсь косонзэ быдэстозы. Вуриськисьёс чотало, кӧня басма, тесьма, бирды но мукетыз кулэ луоз, соку ини лавкаысь но октӥськыны яралоз.

Оглом вуриськон цехын ужа 4 адями. Куддыръя соос вакчи дыр куспын туж трос ужез быдэстоно луо. Кылдо чакламтэ учыръёс. Огполаз быдэс спектакльлы дӥсь вуризы, нош миськемзы бере басмаез пуксиз, актёръёс дӥсязы уг ни тэро. Нош премьера дорозь одӥг арня кылемын. Сыӵе дыръя вуриськисьёс, уй-нуналэз тодытэк, ужало.

4 сюрс костюм

Театрлэн тужгес тунсыко интыез — костюм возён инты. Таӵе висъетъёс Удмурт театрын 3. Котькудӥз выжысен вӧлдэтозь вешалкаосын тырмытэмын. Котькудаз — радэн-радэн костюмъёс. Ваньзэ чотад ке, пыдкукен но изьыен-шляпаосын ӵош ог 4 сюрс костюм луоз. Котькуд вешалкаын спектакльлэн нимыныз наклейка лякемын. Озьы ик котькуд костюм бордын бирка юнматэмын — актёрлэн нимтулыныз. Озьыен, Сергей Наговицын артистлэсь дэремзэ ноку уз дӥся Вадим Дмитриев. Озьы ик дӥсь бордын ошемын пуйы — отын костюмлы тупась пыдкук, перчаткиос, очки, брошь, веер но мукетыз.

Театрлэн репертуараз вань спектакльёс, кытын ужа быдэс труппа. Озьыен, 43 артистлы дӥсь вуттыны кулэ. Куд-огаз постановкаын одӥг актёр 2 роль шудыса вуттэ. Нош тужгес ӧжыт костюмъёс вуремын «Пуны» спектакльлы. Татын 2 гинэ героез. Спектакль кык составен мынэ бере, озьыен, 4 костюм дасямын.

Театрысь дӥсьёсын кивалто костюмеръёс. Костюмерной цехын 4 мурт ужа. Соос кулэ дӥсез актёрлэн гримёркаяз нуо. Дӥсь котьку но чылкыт утялтэмын луыны кулэ. Шуом, кыӵе ке спектакльын артист бызьылэ, тэтча, нюла. Соку спектакль бере та дӥсез сузяно, миськоно, выльысь утюгано луэ. Спектакль мыныку но, костюмер катанчи сьӧрын сылэ. Шуом, артистлэн спектакль дыръя костюмез янгышен кеськыны быгатэ, сое кӧня ке секунд куспын венен тэчоно, нош мукет нуналлы вурӟоно, выльдоно луэ ни.

Куд-ог спектакльёсын артистъёс постановка ӵоже кӧня ке пол дӥсьсэс вошъяло, актёрлы, сцена вылэ потыкуз, одӥг секундлы но ӝеганы уг яра. Озьы «Отцы и дети» драмаын актриса Оксана Гаврилова дӥсьсэ 4 пол воштэ. Костюмер юрттытэк, со ӝегалоз, уз вутты. Куддыръя талы кӧня ке минут гинэ кыле. Уката ик нылкышно дэремъёслэн бирдыоссы-каптырнаоссы ӵапак тыбыразы, артист ачиз бирдыяськыны уз пӧрмыты. Соин костюмеръёс — нырысетӥ юрттӥсьёс. Сцена вылын репетиция мыныку, катанчи сьӧрын репетиция ортчыто костюмеръёс. Соос минутэн-секундэн чаклало, кӧня дыр кулэ тазэ яке созэ костюмез дӥсяны.

Театрлэн репертуарысьтыз спектаклез кушто ке, костюмерной цехысь дӥсьёсты но утялтыны кулэ. Ӵемысь та костюмъёсты гуртысь калык театръёслы сёто. Отын театр дӥсьлэн 2-тӥ улонэз кутске.

Йырси, мыйык но туш

Актёрлэсь образзэ кылдытыны юрттэ постижёр. Та адями парикъёс, шиньонъёс но туш-мыйыкъёс лэсьтылэ. Удмурт театрын та уж кема аръёс ӵоже оскемын Людмила Вшивцевалы.

Людмила Ивановна парикез уг лэсьты — «вуре». Ужаз кутэ искусственной йырсиез но, зэмоссэ но. Постижёрлэсь ужзэ ювелирлэн удысэныз ӵошатыны луоно, уго со котькуд йырсиез оген-оген бича, шуыны луоз. Людмила Вшивцевалэн ӝӧк вылаз, парикмахерлэн сямен, шпилькаос но заколкаос, йырси пазян лакъёс но гельёс. Тани «Золушка» выжыкыллы лэсьтэм парикъёс — дась причёскаос, соосты артисткаос йыразы поно. Вуриськисьёс сямен ик, постижёр но парик, шиньон, туш яке бакенбард котькуд актёрлы нимаз лэсьтэ. Солы ичизэ арня пала дыр кулэ. Спектакль бере постижёр вань парикъёсты бича, соосты сына, утялтэ — озьыен, вуоно постановкалы соос дасямын ни.

Кыкетӥ улон

Син пӧртмасьёс ужало бутафорской цехын. Бутафор — зэмос арбери интые солы тупась реквизит лэсьтӥсь. Спектакльлы кулэ луись «запчастьёсты» ваньзэ ик магазинысь уд шедьты, нош куддыръя коньдонэз но шыръяно луэ.

Бутафорской цехын кулэтэм арбериослы 2-тӥ улон сётыны быгато. Канфет коробкаос, сӥньыс шпулькаос, вуж ку сумкаос — номыр мултэс ӧвӧл. Бумагаез «корт» каро, пластмассалэсь «пу» пӧрмыто, пластик ӟенеликлэсь — «хрусталь» бокал, корона. Учкись малпа, ваньмыз та зэмос шуыса. Ӝӧк-пуконъёс, шкафъёс бордысен кутскыса, чыры-пыры запонкаос дорозь — ваньмыз та быдэсме театрысь амало ужасьёслы луыса. Нялтас вераса, реквизит лэсьтӥсьёс спектакль бордын ваньмызлэсь азьло ужаны кутско, нош ужзы йылпумъяське ваньмызлэсь бер.

Пӧртэм постановкаослы дасям арбериос асьсэлэсь дырзэс витё реквизиторской цехын. Татысь куд-ог реквизитъёс кӧня ке спектакльын «уло». Куддыръя вуж арбериез тупатъяло-чеберъяло но выль спектакле потто.

Алёна ИОНИНА
Апрель 5, 2019
газ.«Удмурт дунне»