Удмуртиысь Йӧскалык театрын Степан Широбоковлэн пьесаезъя «Ой, чебер нылъёс» спектакль (12+) дасяло. Театрлэн историяз сое куинетӥзэ пукто ни. Таяз радэ крезьгуро комедия бордын егит актёръёс Константин Ложкин но Марина Самсонова ужало. Маин со висъяськоз азьвыл возьматонъёслэсь, ивортодэтъя «Удмуртия» агентстволы ужъюртысь литературая ёзэтлэн кивалтӥсез Наталия Панфилова вераз.

Солэн кылъёсызъя, егит пуктӥсьёс спектакль туала адӟиськыны кулэ шуыса лыдъяло, со дыре ик йӧнсыз медаз луы. Учкисьёс азе асьме дырысь огшоры адямиос потозы.

Азьвыл пуктэмъёсын ӵошатыса, таиз сэзьгес луоз, трос кырӟанъёсын, эктонъёсын, пропогандистской визьноданъёс уз луэ. Ваньмыз улэпкын кырӟалозы, со понна микрофонъёсты уже кутозы. Театр нош ик кырӟанъя дышетӥсез Валерий Каракуловен валче ужа, учкисьёсмы сое «Алые паруса» мюзиклъя тодо ни. Озьы ик спектакльын валтӥсьтэм рольёс уз луэ, ваньмыз соос адямилэсь аспӧртэм сямзэ возьматозы, уката ик нылкышно образъёс Наталия Панфилова, Удмуртиысь Йӧскалык театрысь литературая ёзэтлэн кивалтӥсез

Ваньмыз со егит режиссёрлэн малпанэныз герӟаськемын – туала улонлэсь ӝог ортчемзэ возьматыны, пусъе Наталия Панфилова. Спектакльлы ӝоглык сётэ Марина Самсоновалэн сценаез чеберлыкъя тырмытэмез но. Декорация огшоры улон-вылонлэсь кыдёкын луоз. Нимысьтыз спектакльлы гироскутер басьтӥзы. Геройёслэн костюмъёссы но туала.

Широбоковлэсь пьесазэ туала карыса, пуктӥсьёс уг вунэто, спектакльын яратон тема валтӥсез луэ шуыса. Нош кызьы тодмо, яратонэз, шудэз шедьтон мылкыд, арлыд но дыр шоры учкытэк, котьку вал, вань но луоз Наталия Панфилова, Удмуртиысь Йӧскалык театрысь литературая ёзэтлэн кивалтӥсез

Наталия Панфилова тодэ вайытӥз, Степан Широбоковлэн пьесаезъя нырысетӥзэ спектаклез 1969-тӥ арын пуктӥзы. Со куинь ар ӵоже гинэ мынӥз ке но, 100-лэсь трос пол возьматӥзы. 1999-тӥ арын пуктэм спектакль театрлэн сцена вылаз 13 ар возиськиз. Берлозэ 2012-тӥ арын толсуре возьматӥзы. Учкисьёс сое туж яратӥзы ке но, ужез дугдытоно луиз: пьесалэн геройёсыз – егитъёс, нош артистъёс уг егитомо.

Спектаклез репертуарысь поттэмлэсь азьвыл ми оскытӥмы, егитъёс берытскем бере спектаклез нош ик репертуарамы пыртомы шуыса. Валамон, туала пуктӥсьёс, артистъёс, театр азьын ужпум огшоры ӧвӧл, пьеса тодмо но сцена вылын кема мынӥз ке но – учкисьёс али но кыксэ ик спектакльёсты но отын шудэм артистъёсты тодазы возё – мар ке но выльзэ шедьтэм, азьвыл усьтымтэ кыӵе пуштроссэ сайкатэм потэ Наталия Панфилова, Удмуртиысь Йӧскалык театрысь литературая ёзэтлэн кивалтӥсез

Ватсалом, Константин Ложкин но Марина Самсонова спектаклез пуктӥсьёс сямен нырысьсэ ӵошен ужало. Но Ложкин театрлэн сцена вылаз нылпи выжыкылъёсты, литературая композициез, Вормон нуналлы сӥзем концертъёсты дасялляз ни, нош Самсонова кӧня ке спектакльёслы оформление лэсьтӥз, пуктӥсь суредасьлэн сямен берлоез ужез - «Жингрес сӥзьыл» крезьгуро комедия.

Егит пуктӥсьёслэсь выль ужъемышсэс учкисьёс 23-тӥ куартолэзе дунъяны быгатозы.

Агроном Гирой Матвеевич котыр ласянь синмаськымон: йӧно, чебер, ужась, быгатэ усто вераськыны но аслыз синмаськытыны, но одӥг гинэ шекез вань – чебер нылэз адӟе ке, соку ик синмаське. Анаезлэн сюлворемезъя, егит адями кышнояськыны кылзэ сётэ. Егит но чебер бухгалтерез Соняез, яратӥсько но гажасько шуыса, кышнолы кура. Епифановна, Гиройлэн анаез, шумпотэмын: пиез табере «визьмаськиз» но солы кен ваёз, нылаш солы туж кельше. Быръемын ини сюан нунал, вань ӵыжы-выжыоссы солы дасясько, но тупаны но кулэ ук, соослэн гуртазы витьымтэ шорысь выль ужась вуэ – чебер но синмаськымон нылаш Тоня…

Майя Бывальцева
29 куартолэзь 2019
ИА«УДМУРТИЯ»