27-тӥ но 28-тӥ тулыспалэ Удмуртиысь Йӧскалык театрын Александр Островскийлэн «Бедность не порок» пьесаезъя «Вожояськон» (12+) спектакльлэн премьераез ортчоз. Нунал азьвыл ивортодэтъя «Удмуртия» агентстволэн корреспондентэз йылпумъян репетицие вуылӥз.
Выль спектакль - театрлэн эшшо одӥгез эскеронэз шуыны луоз, дыр. Нырысь ик, пьесаез Москваысь Пичи театрысь ӟуч режиссёр Андрей Цисарук пуктӥз. Декорациосты но костюмъёсты озьы ик Москваысь суредась Василиса Кутузова кылдытӥз. Кыкетӥез: ваче пӧлэстӥськизы 19-тӥ даур но туннэ нунал. Туннэез, оло, тросгес но адӟиськоз. Со сяна, спектакле удмурт лул шокчемын, озьы возьматэм учыр удмурт карын яке гуртын луиз кадь йӧтэ - геройёс удмурт дӥськутэн ветло, удмурт кырӟанъёс чузъясько. Гуръёсты бырйиз но дасяз Анатолий Эркишев.
«Вожояськонэз» толэзь но ӝыны ӵоже пуктӥзы. Соин ик спектакль дыр ортчемья «кисьмалоз» на, лыдъя Андрей Цисарук. Озьы ик солэн кылъёсызъя, удмурт кылэз тодымтэез актёръёсын ог-огзэс умой валанлы ӧз люкеты.
Актёръёс сярысь нимаз веран - соос зӥбытэсь, но зэмлыкоесь, соос туж зэмлыко ужазы. <…> Мыным туж тунсыко татын ужаны, ужаммы мыным туж кельшиз. <…> Куке кылэз уд тодӥськы, ужаськод шӧдон вылын гинэ. Дыр ортчемъя ми ог-огмес валаны кутским, малы ке шуоно театрен вырись адямиослэн асьсэ кылзы вань – кызьы адями чалме, кызьы мар ке но вера яке номыр уг вера. Соослэн чалмемзыя валаны луэ, мар пӧрме
Андрей Цисарук, пуктӥсь режиссёр
Яша Гуслинлэсь рользэ быдэстӥсь Вадим Дмитриев верамъя, удмурт кылэз валасьтэм режиссёрен ужан сокем секыт ӧвӧл.
Мыным потэ, секыт ӧй вал ужан, малы ке шуоно со милемын ӟуч кылын ужаз, ми ӟуч кылэз тодӥськом, валаськом. Но эшшо капчи, со умой режиссёр шуыса, малы ке шуоно со куд-ог дыръя кык-куинь кылъёсын но быгатэ вал валэктыны кыӵе ке аслэсьтыз куронзэ, вот со кык-куинь кыл куспын но ми валаськом вал, мар со милесьтым куре но, малпасько, ми пӧрмытӥм, быдэстӥм солэсь вань куронъёссэ
Вадим Дмитриев, Яша Гулинлэсь рользэ шудӥсь
Озьы ик Вадим Дмитриевлэн верамезъя, палэнысь режиссёрен ужан выль мылкыд сётэ, мукет луонлыкъёсты усьтэ.
Мон понна, шуысал, туж бадӟым пӧртэмлыкез, малы ке шуоно Андрей Цисарук ужаз милемын кино амалэн. Со милемлы шуэ вал: «Малы тӥ кесяськиськоды, эн кесяське. Тани со тӥ азын сылэ - вераське гань-гань, кулэ ӧвӧл кесяськыны». Вот со амалэн шудон - милемлы выль шӧм вал со, соин ик пичияк секытгес вал. Но али, толэзьлэсь ятыр ужам бӧрсьы, со амал пичияк пушкамы пыӵаз шуыса, со мон понна туж бадӟым плюс
Вадим Дмитриев, Яша Гулинлэсь рользэ шудӥсь
Спектакль котькыӵе вакытлы тупась юанъёс пуктэ: узыр яке начар улон, яратон яке адямилэн шекъёсыз, мар кулэ адямилы шудо луон понна, мар тужгес дуноез улонын?
Вашкалазэ но туалазэ люко но огазеяло, геройёслэсь сямъёссэс возьматыны юртто коркалэн пушкыз но дӥськутъёс. Кылсярысь, фабриакнтлэн Африкан Сафичлэн костюмез но узыр купечлэн Гордей Карпычлэн коркаысьтыз креслолэн огкадь буёлзы чик но юнме шорысь ӧвӧл. Одӥг ласянь, со фабрикантлэсь кескич, кык пало луэмзэ возьматэ, мукет ласянь, купечлэсь пыриськон сямзэ.
Нош удмурт шӧмо дэремъёс выжыосын но герӟало, туала но луо.
Мыным театрын туж чебер книгаос сётӥзы, мон соосын пуки, учки, утчай – со зэмзэ но туж чебер. Но куд-ог пужыосты, книгаосын возьматэмзэ инъет карыса, аслым малпано луиз, кытын ке буёлзэ кӧня ке воштӥ, со декорациосы мед тупалоз шуыса: миндэръёс, шобретъёс кӧня ке бездытэсьгес, кӧня ке вужмытэмын
Василиса Кутузова, пуктӥсь суредась
Ми валтӥсь малпанэз вуттыны тыршимы: бен, адямилы туала луыны кулэ, дырлэсь ӧвӧл кылёно, но соку ик ас выжыосын кусыпъёсты ӧвӧл ыштоно, угось соос кужым сёто, утё сое, мар асьмедыз адями каре. Со сярысь ми малпаськыны тыршимы суредасен, командаен. <…> Потэ, егитъёс мед учкозы шуыса. Но оскисько, со семьяен учкымон спектакль луоз
Андрей Цисарук, пуктӥсь режиссёр
Луоз на-а азьланяз кыӵе ке валче ужзы юанлы валэктон сётыса, Андрей Цисарук сыӵе луонлыкез ӧз палэнты.
«Учком, кызьы тазэ пумиталозы, улон кызьы возьматоз. Оскисько, луоз», - вераз со.
Удмуртиысь Йӧскалык театрлэн кивалтӥсез Андрей Ураськин озьы ик Андрей Цисарукен ужамзэс умой дунъяз но палэнысь режиссёръёсын ужаны мылкыдзы сярысь вераз.
Милемлы со яраз, кызьы ужаз, кызьы соин ми ужамы театрын, со улӥз но театрын шуыны луоз. <…> Ми али сыӵе опытъёс лэсьтылӥськом: ӧтьылӥськом мукет театръёсысь мукет регионъёсысь режиссёръёсыз, ну и Удмуртиысь но мукет театръёсысь режиссёр-постановщикъёсыз
Андрей Ураськин, Удмуртиысь Йӧскалык театрлэн кивалтӥсез
Тодэ вайытом, выль сезонын удмурт театр ньыль выль спектакль возьматыны чакла. Куарусёнэ Николай Гогольлэн «Мёртвые души» поэмаезъя пуктэм ужзэс нырысьсэ возьматӥзы, нош толсуре учкисьёсты «Васьлей» комедиен тодматӥзы.
Майя Бывальцева
27.02.2019
ИА«УДМУРТИЯ»
