Государственный национальный театр Удмуртcкой Республики

  Москваысь режиссёр Йӧскалык театрын удмурт кылын спектакль пуктоз  

Выль ар ужрадъёс бере Удмурт йӧскалык театрын Александр Островскийлэн «Бедность не порок» пьесаезъя «Вожояськон» спектакль бордын уж кутскоз. Сое удмурт кылын Москваысь Кун академ Пичи театрысь режиссёр Андрей Цисарук пуктоз. Со сярысь ивортодэтъя «Удмуртия» агентстволы Йӧскалык театрысь литературая ёзэтлэн кивалтӥсез Наталия Панфилова вераз.

Солэн кылъёсызъя, театрлэн кивалтӥсез Андрей Ураськин но валтӥсь режиссёрез Алексей Ложкин ӧтем режиссёрен ужаны кемалась мылкыд каро ни вал. Трос ӧнерчиосты эскерыса, Москваысь егит режиссёрлы Андрей Цисаруклы вазиськизы. Со Николай Островскиез пуктылэмын, солэсь творчествозэ гажа, шуэ Наталия Панфилова.

Вуоно спектакльлы инъет луиз Михаил Петровлэн берыктэмез. Постановкаын туалаез но классика огазеяськозы. Со сяна, «Вожояськонэ» йӧскалык шӧмез пыртозы.

Татчы ми пыртӥськом на мар ке йӧскалыксэ, адӟиськоз со дӥськут пыр, кырӟанъёс пыр. Сое «Бедность не порок» ӧм нималэ ук, ми сое нимамы «Вожояськон». Татын валтӥсез луоз вожодыр шудонъёс, кырӟанъёс, <…> соин ик ми малпамы сое удмурт кылын пуктыны
Наталия Панфилова, Удмурт йӧскалык театрысь литературая ёзэтлэн кивалтӥсез

Ӧнерчи верамъя, Николай Островскийлэн творчествоезъя пуктэм спектакльёсты Удмурт театрлэн учкисез адӟиз ни, но таиз калыклы матынгес но валамонгес луыны кулэ.

Островский милям мынӥз вал ни, мукетъёсыз спектакльёс. Удмурт театрмы будэмын шуод-а, мар-а классика вылын. Милемлы потэ, ми удмурт кылын эшшо пуктӥм ке, со эшшо матынгес луоз калыклы, валамонгес луоз, малы ке шуоно та чылкак классика уз луы Наталия Панфилова, Удмурт йӧскалык театрысь литературая ёзэтлэн кивалтӥсез

Наталия Панфилова пусъе, спектакль бордын ужаны дыр ӧжыт. 10-тӥ толсуре Андрей Цисарук одӥг нуналлы гинэ Ижкаре вуылӥз но Москваысь суредасьлэсь Василиса Кутузовалэсь спектакльлы кылдытэм макетъёссэ ваиз. Та дыре цехъёс дӥсь но декорациос бордын тыршо ни, нош репетициос толшорлэн 20-тӥ нуналъёсаз кутскозы.

20-тӥ толшор котырысен ачиз режиссёр кутскоз актёръёсын репетициосты, быръёз, кин кыӵе ролез шудоз. <…> Со азьвылгес пуктӥз Островскиез осетин кылын, осетин кылэз валатэк. <…> татын но озьы ик ужалоз. Кылэз валан – со валтӥсез ӧвӧл ук, валтӥсез – мылкыд, образэз кылдытон. Тем более отын актёръёс луозы, валтӥсь режиссёр но драматургмы, соос юрттозы
Наталия Панфилова, Удмурт йӧскалык театрысь литературая ёзэтлэн кивалтӥсез

Чакланъёсъя, «Вожояськон» спектакльлэн (12+) премьераез 2019-тӥ арын 27-28 тулыспалэ ортчоз.

Ватсалом, али Удмурт йӧскалык театр «Весёлый Роджер» Выль ар выжыкыллы дасяське. 20-тӥ толсурысен 8-тӥ толшорозь артистъёс нуналаз 2-3 спектакль возьматозы.

Тодэ вайытом, 6-7 толсуре Йӧскалык театрлэн учкисьёсыз «Васьлей» комедиез нырысетӥзэ адӟизы.

Наталья Тетерина
11.12.2018
ИА «Удмуртия»