6-тӥ но 7-тӥ толсуре Удмуртиысь Йӧскалык театрын «Васьлей» спектаклэн премьераез ортчоз. Егит драматурглэн Сергей Антоновлэн пьесаезъя кык ёзэн комедиез Алексей Ложкин пуктӥз.

Гуртысь Васьлей коӵыш карысь патере вуэ но отын коркакузёен пумиське. Ӵошен соос адямиослэн улонзы шоры учко, яратон но кулон сярысь верасько. Нош адямиос уг но малпало, кин соосты чакла, вӧзазы ик мар ке но паймымонэз улэ шуыса…

Кызьы вераз журналистъёслы Сергей Антонов, та пьесаез гожтыны малпан шуак-дуак лыктӥз.

«Одӥг нуналэ ыбиз кадь йыртышкам, мар меда та пудо животлэн йыраз, мар ке но, кыӵе ке но йырвизьыз вань ук солэн, мар ке сярысь малпаське ук со», - вераз драматург.

Солэн кылъёсызъя, коӵышез гожтыкуз син азяз театрысь артистэз Константин Никитинэз пуктылӥз. Коркакузё интыын Александр Баймурзин адӟиз. Та ласянь адӟонзы режиссёрен тупаз шуыны луэ.

Константин Никитин верамъя, со дор пӧйшурез сцена вылын шудоз шуыса ноку ӧз малпалля.

Коӵышез шудон понна коӵыш сярысь мон нырысь ик ӧй малпаськы, нырысь ик адями кадь малпаськи сое, кызьы сое лэсьтыны, кызьыгес вырын отын. Малпасько вал нырысь Ютубын учкыны яке кытысь ке мукет интыысь, сое адӟыса, кинлэсь ке но «лушканы», нош татын кызьы пӧрмоз, озьы ик пӧрмоз
Константин Никитин, Васьлейлэсь рользэ шудӥсь

Никитинэн вошъяськыса, коӵышлэсь рользэ быдэстэ эшшо одӥгез егит артист - Вадим Дмитриев.

Роль мон понна бадӟым, одӥгез, дыр, бадӟымез, кудзэ мон шудӥсько али. Соин ик тросгес ас пушкам, ас дуннеям кошкылӥ шуод-а, мар-а, тросгес отын йыромыса, ышылыса ветлӥ - кыӵе ке но выросъёс, маръёс, малпанъёс, кызьы меда коӵыш улэ, мар сярысь со меда малпаське. Коӵышлэсь выросъёссэ но тырши учкыны тазьы урамысь, ас вылам но эскерылӥ со выросъёсты
Вадим Дмитриев, Васьлейлэсь рользэ шудӥсь

Дмитриевлэн кылъёсызъя, со чылкак коӵышез гинэ возьматӥз шуыны уг луы. Куд-ог интыын со ассэ адями кадь возе.

Мон шуысал, коӵыш но адями одӥг мугорын, малы ке шуоно кытын ке но солэн поталляз кыӵе ке но коӵышлэн выросъёсыз, но кытын ке но со мугорлэн шуод-а, мар-а, шӧдскиз, поталляз адямилэн сюлэмыз, адямилэн шуг-секытъёсыз
Вадим Дмитриев, Васьлейлэсь рользэ шудӥсь

Васьлей туж эрико но сэзь коӵыш. Кытӥ-отӥ жоб кылъёс но куштэ, йӧнсыз выросъёсты но возьматэ. Со дыре ик вордскем юртэзлэсь, пересь кузёезлэсь мӧзмон сюлэмзэ чигтэ.

«Куке нырысь лыдӟим, мон сразу валай, та кылъёс юнме шорысь отчы пыртэмын ӧвӧл шуыса - мед луозы шуыса соос. Мон валасько вал, соосты басьтӥд ке, спектакльлэн, пьесалэн кыӵе ке шӧмыз, тунсыкоез маиз ке быроз шуыса. Соин ик сцена вылысен но алама кылъёсты вераку, мон сое буш интыысь уг поттӥськы, соос вордӥсько марлэсь ке но, кин ке монэ куатаськытӥз-а, вӧсь кариз-а, со солэсь потэ. Со алама выросъёс но чик юнме шорысь уг пото, марлэсь ке но аламаезлэсь кылдо. Мон ӧй шуысал, мыным секыт вал шуыса соосты вераны», - вера Вадим Дмитриев.

Режиссёрлэн Алексей Ложкинлэн кылъёсызъя, пьеса туж зол гожтэмын, соин ик со борды басьтӥськыны курдытгес но вал. Огдыре куинь улон сюресэз возьматоно но огазеяно луиз – адямилэсь, пӧйшурлэсь но мукет дуннеысь луллэсь.

Асьмеос адямиос возьдаськиськомы вераны сое, мар милям вераммы потэ, нош тани, шуом, пудо животъёс верало ваньмыз кызьы вань. <…> Со самой валтӥсез шуысал мон. Мон ӧй туртты, со писэй именно мед писэй луоз шуыса, со адямилэсь сямзэ всё равно возьматэ. Собере отын вань корка кузё - со опять пӧртэм мар ке. Котькудӥз улэ аслаз улонэныз – адямилэн, коӵышлэн, корка кузёлэн
Алексей Ложкин, режиссёр

«Васьлей» комедия шуыса ялэмын. Спектакль ӵоже зэмзэ но трос серемес учыръёс кылдо, но со дыре ик малпаськытӥсез но вань.

«Чеховлэн «Чайкаез» но комедия гожтэмын. Комедия-а со? Со улон, улон – со ваньмыз комедия, быдэс улонмы асьмелэн серем. Соин ик комедия – со тупамон», - лыдъя Алексей Ложкин.

Сергей Антонов верамъя, со пьесазэ комедиен уг лыдъя, ачиз ужзэ «фантазия на тему из жизни кота» шуэ. Коӵыш азьын адями аслэсьтыз умойзэ но, уродзэ но уг ваты, но улонын асьмеос мукет луыны тыршиськомы.

Вераме потэ вал, адямиос асьсэ шоры палэнысен мед учкозы шуыса. Ми ог-огмес ум адӟиське ук, кызьы ми палэнысен выриськом, кызьы ми дорамы асьмемыз возиськом. Урамын, камера азьын тазьы сылӥськом, чеберъяськыса да мар, нош коркан озьы ик трусик коже, майка коже ветлӥськод, носкиед но пась, дыр, куд-ог дыръя луылэ. Ми кызьы ке но вунэтӥськомы-а мар-а со сярысь, сыӵе палмы но милям вань шуыса. Вот адямиос мед учкозы коӵышлэн синъёсыныз, кызьы соос палэнысен адӟисько
Сергей Антонов, драматург

Коӵышлэн кытӥяз туж эрико ассэ воземез вань учкисьёслы уз кельшы, дыр. Драматург но, режиссёр но, артистъёс но валало, спектаклез курланы но быгатозы шуыса.

Оло, тросэзлы та уз кельшы, но ми сое тодыса басьтӥським. Удмурт театрын та порма спектакльёс, зэмзэ вераса, ӧй на вал, соин ик олокыӵе но, оломар борды но йӧттӥськоно шуыса малпасько, туала вакытэн артэ вамыштоно. <…> Милям ужмы - котькуд уж эксперимент кулэ луыны. Одӥг кадь шур быземъя кошконо ӧвӧл, пумитъяськоно но кӧня ке, соин ик, мон малпасько, та уж кӧня ке но бугыртоз асьме калыкмес но, артистъёсмес но, асме но
Алексей Ложкин, режиссёр

«Арлыдоосыз, уката ик удмурт театрлэн учкисьёсыз, мынам малпамея, соос дышемын ӧвӧл таӵе спекткльёслы, нош пинал зрительлы, мынам малпамея нош ик, кулэ кадь сыӵе спектакльёс», - шуиз Сергей Антонов.

Мыным потэ, котькуд спектакльлэн вань аслаз учкисез. Оскисько, та спектакльлэн но – выль шӧмо спектакльлэн. Мыным малы ке но кемалась потэ ни вал таӵе спектакльлэн кулэлыкез удмурт театрын, малы ке шуоно та кыӵе ке но выль шӧм, выль омыр выль учкисьёсты кыскон понна, мон малпасько. Егитъёслыгес таиз пуктэмын ке, малпасько, егитъёслэн, оло, луоз мылкыдзы та спектакле ветлыны
Вадим Дмитриев, Васьлейлэсь рользэ шудӥсь

Коркакузёлэсь рользэ Удмуртиысь калык артистъёс Кадим Галиханов но Александр Баймурзин шудо. Васьлейлэсь егит кузёзэ – Максим Князев но Константин Исаков. Спектакльлэн пуктӥсь суредасез – Ольга Глухова, крезьгур бырйиз Алексей Пикулев.

«Васьлей» спектакль удмурт кылын мынэ, ӟуч кылэ синхрон амалэн берыктон луоз. Чакламын 18 ареслэсь бадӟым учкисьёслы.

Ватсалом, Йӧскалык театрлэн пичи сцена вылаз Сергей Антоновлэн «Пуны» драмаез мынэ. Сое учкисьёс туж умой пумитазы. Нялтас вераса, туэ куарусёнэ озьы ик пичи залын театрысь егит артист Максим Григорьев «1900-й. Легенда о пианисте» моноспектакленыз тодматӥз.

Тодэ вайытом, выль сезонын удмурт театр ньыль выль спектакль возьматыны чакла. 20-тӥ куарусёнэ Николай Гогольлэн «Мёртвые души» поэмаезъя пуктэм ужзэс нырысьсэ возьматӥзы.

Майя Бывальцева
06.12.2018
ИА «Удмуртия»