Удмурт театрлэн сцена вылаз воректӥз А. Грибоедовлэн дауръёсы вужмисьтэм «Горе от ума» пьесаезъя спектакль. Кык люкетэн комедилэн премьераез ортчиз 15-тӥ-16-тӥ ноябре. Пуктӥз сое Москваысь режиссёр, Россиысь искусство удысысь дано ужась но калык артист С. Яшин.
Школаын дышетскись нылпиос понна театрлэн репертуараз пыро тодмо ӟуч классикъёслэн произведениоссыя ӟуч кылын дасям спектакльёс. «Горе от ума» озьы ик дышетскон программаын. Зал тыр пинал учкисьёсты адӟыса, малпан кылдӥз вал: Грибоедовлэн бадӟым монологъёсын гожтэм кылбуро пьесаез Интернет дуннее выем пинал сюлэмъёсты вырӟытоз меда?
Но … залын шыпыт вал, пукисез ик ӧвӧл, кожалод. Кык но ӝыны час ӵоже учкисьёс выйизы сцена вылысь йыр поромон дуннее. Артистъёс бызьыло, тэтчало, лобало… Мылкыдъёссы вӧтын сямен кисьтӥсько, капчи крезьгур но юрттэ соосты ӧръяны (крезьгурез — И. Шварцлэн произведениосысьтыз). Сцена вылысь суредъёс-декорациос но берганы, ветлыны кутско спектакль азинскемъя но геройёс вошъяськемъя.
Ӧйтӧд, кызьы, вылды, асьсэлы артистъёслы сётӥськиз та комедиын шудон, монологъёсты улӟытон, нош сцена вылэ соос шудон-серектон мактал туж капчиен потазы кадь. 19-тӥ дауре нуллоно дӥськутъёс чик ӧз люкетэ артистъёслы «шузияськыны». Грибоедовлэн вакытэз син азе пуксиз декорациос пыр но (суредась — Н. Яшина).
Оглом вераса, артистъёс но спектакль бордын ужасьёс учкисьёслы мӧзмыны ӧз сётэ, вашкала даурысь улон-вылонэз возьматыса. Троссэ сое туала нуналмы вылэ но мертаны луоз уго. Пыриськон, пӧяськон, кыл вӧлдон, адями борды лякиськись мукет кыж-мыжъёс дуннеен кивалтэмысь ноку ӧз дугдылэ. Со ласянь Грибоедовлэн пьесаез туннэ но улэп.
Комедия туж узыр пӧртэм лэчыт веранъёсын. Компьютерлэн кылыныз вераськись нылпиос, спектаклез учкыса, ӟуч кыллэсь макем узыр луэмзэ шӧдытэк уз кыле, дыр. Бен, со, оло, кинлэн ке пель сьӧртӥз ортчоз, нош кинлы ке одно ик сюлмаз пыӵалоз.

Лия Малых
газ.«Удмурт Дунне», 22ноября 2013 г.